MSL XI – League Round Zo!
Hello… Heti ngawt mai zawng
Mizoram Super League (MSL) 11 chu league round khelh zawh a ni a, tualchhung basketball hmasawnna a pungin a thang hran lo va, a hah te an hah em em a, sum sengten an sen belh tam tual tual bawk a, heti ngawt mai zawng a fuh ta lo; mahse, engtinnge hma lam kan pan chuan ang?
Kan nihna dik tak hi chhut ila!
India ram sports huanga kan chiri leh nep zia lanna chu Olympic a lo inherchhuah apiangin a hriat a, ram dang sports lama thangchhuahte aia India rama mi ve te tho kan han entawn ngat phei hi chu a va zia lo thin tak!
MSL hi a ngaihlu hi chuan kan la hlut viau! Chutih rualin, a inelna buatsaihtu Mizoram Basketball Association (MBBA) puipa lama a hah te hi chu hah tak an ni – lang lo lama an tha leh ngaihtuahna sen zawng zawngte hi a zahawm ngawt mai. An inpekna ringawt erawhin chuti takin awmziaa nei lo thung!
League round-a Hawla Indoor Stadium pan mipuite pungkhawm zat The Aizawl Post Hoops Mania chuan ngun takin a thlir a, a chhut zui a, MSL season hmasa lam thlirin kan tla hniam tial tial – hei hi inelna buatsaihtu association dang thlirin an nihna ve tho a ni – volleyball lam erawh hi chu an invawrh sang ta fu!
MSL club lam dinhmun pawh hi ngaihtuahawm tak a ni! Tuna kan top 5 team zinga 2 hi season tharah kan hmu tawh lo maithei – hei hi MSL 11 zawh lamah kan la chai zui ang.
Mister Zonet!
MSL 11 tip off neih zana inelna chhuahtu Zonet lam aiawha thusawitu Pu Mapuia khan, ‘hit chang leh tlakhniam chang a awm thin thu a sawi a, a lar em lar lo em tihin chuti lutuka a guide loh thu’ a sawi a nih kha!
Zonet lam hian an theh lar ta lo fu, fakawm leh kut bengthawm nasa tak nena bul an tan MSL hi a zuih ta em em a nih hi!
MBBA nen MSL X tawp rualin season 3 thawkdun turin inremsiamna an nei a, tun ang dinhmunah hi chuan Zonet hian thapui chhuaha tan a lak loh chuan MSL hi sawngnawi takin a zuzi hmel ta riau!
Thlanlung pawn lam hnawih var
MSL! – Tualchhung basketball hi MBBA puipa lam leh Zonet aia thangin hmasawn se tia ngaihtuahna leh tha seng nasa an awm lo – hei hi chu a chiang.
Amaherawhchu, khi thli khi a chiang kan ti ngawt a, a chiang leh si hauh lo! MSL club neitute hian entu mipui tlahniam mek te; a duh apiang hmehchhuah theih tura chhawpchhuak mai lo va youtube lama Zonet lamin lei ngaia an dah tang ta tlat mai te; All Star night boruak hiptu tlem ta lutuk te leh an hloh tam tial tial te hi an hai lo!
Inkhel zawha fans lamin hnam dang players thla an lakpui sap sap te, social media lama an vawrh darh chum chum te hian pawn lama kan lan dan pui hmel viau mah se, chhung lamah erawh heng players chahchhuaktu lam MSL CLUB te hian The Aizawl Post Hoops Mania bengah erawh a inkhel berin hlut a hlawh tak loh avangin kalphung ngaia kal reng hi atthlak tihna chen an neih thu an sawi ri a ring ta fu!
Heti hian le…
MSL bik hi uluk taka beng mai sik lovin, sum chevel chhehvel leh mipui tana awlsam leh zangkhai zawka thlir a hlawh theih nan MSL 12 hma ngei hian zirchiangtu awm se, chumi te hmuhchhuah chu MBBA, Club owner leh Zonet lamin thlifim chungin senso tlem leh tlo zawk a awm theih nan bih ho leh se…
Mizo thalai basketball khel pung viauin, zirna leh MBBA insuihzawm tha hle zel mah se, MSL ber a kawchhung a ruah (empty) tlat si chuan a hnam ang pawhin neih zawng zawng sengin thla 2 bawr vel hnam dang players tan sum kan seng ral a ang dawn tlat – tualchhung basketball thanna tur awmze nei zawk hisap a hun ta hle!
MSL XI – League Round Zo! Hello… Heti ngawt mai zawng
