MSL XI a hnai tial tial a, hnam dang transfer thawm ngaihnawm tak tak karah The Aizawl Post Hoops Mania erawhin tualchhung tlangvalte chanchin aia ngaihnawm tih kan nei lo thung.
Kum 2016 a piang chauh ni mah se, kum 8 an tlin meuh chuan MSL champion nomawi an khawih pha titih der – Zemabawk BC hian!
An club hnuhma leh hniak hnutchhiah hi tualchhung basketball chevel chhehvel bengkhawn tân chuan a ngaihnawm satliah mai a ni lo, a pui tlat!
MSL X semi finals-ah beisei loh zawk ni mah se, team hlun Khatla TBL an barakhaih a – game 3 hun tawp dawnah an inter state player ‘Bollywood Beniwal’ nervous luatah freethrow vawi 2 a hlah a, final an lut ta lo a nih kha!
He club hian an fapa chuam Super Mario – Rozama magic hand an chhawr chhunzawm dawn emaw tih laiin, ani hian transfer season kawngkapui zau taka a inhawn laiin Chanmari BC lamah puanthuah telin a pem thut!
ZBBC hian hnual mai lovin, champion trophy chawi ngei MSL XI ah hian an tum zia phochhuak zuiin, season opening transfer bazar nghawr dawt khawpin thawm an nei zui a nih kha!
Player tha satliah an melh lo, champion pui tham theihna nei dapin, an club thluakbur pali Ricky-a, Ruatpuia, Ab-a leh Rca ten lungsi takin Champhai Vengthlang BC atangin Ropuia leh Khatla TBL atangin Thianga an lalut – he club hian Mizo thalai hmakhua sialin, awmze neiin sum pawh an thap huai phal tlat.
MBBA calendar a nghahhlelhawm ber, MSL XI a rawn inherchhuah dawnah meuh chuan boruak titang at zual turin mi dap loh lamah hnam dang player an dap zui – kan la khek rih ang.
The special duo!
ZBBC player lakluh pahnih, tualchhung tlangvalte hi Mizoram basketball inlumlet hre pha chin tan chuan sawi zui ngai lo khawpa talent nei tha ni mah se, khel zui zuai teh ang.
Mizoram pawnah Mr. MVP tia koh ngam khawpa medal awrh tam tawh fit 5’10 a sang, Lalropuia hi inkhel thiam a ni satliah lo, zirna ngaihsak a ni tel tlat.
BA philosophy val hian court chhungah ngaihtuahna a hman thiam chhan hi a lehkhabu chhiar tam rah a ni tih a hriat tel. Can’t Hurt Me by David Goggins tih ang reng buaipui phak ngat hian kum 2025 khan Khatla South tan khelin Mayor’s Cup an champion a, MVP a ni zui cheu.
Mizorama basketball player tha chung chuang chanchin ziahna 1984 tih lehkhabuah Ropuia chanchin chipchiar hi tarlan a ni phak a, hei hian a thiam leh theihna a tarlang chiang hle.
K. Lalthianghlima, Thianga hian basketball mumal taka a khelh tirh aṭangin a tharum ngahna hian a pui hle. Fit 6’3 zeta sang ni tel hek, awmze nei zawka coching a tem hnu phei chuan hmasawnna a tel awk awk a – a tumkhat nan MVP medal kum 2019 khan awrhin, All-India public school -best shooter nihna Ajmer, Rajasthan-ah a hlawhchhuak nghe nghe.
Mizoramah a zirna chawlh lai denchhenin, kum bithliah inelna lamah hming a chher zui a, thup beh zawh loh a talent hian Inter veng MVP ah hlang kaiin kum 2021 leh 2022 khan Thianga tih chuan hai theih lohin sang takah a invawrh zui a ni.
A lo khelh tawhna thin Khatla TBL chuan MSL 7, 2022 khan an team MVP atan thlan a lo ni tawh nghe nghe bawk. Player quality ṭha nei chuan zirna leh lehkhabu chhiar an thlahthlam ngai lo tih kha dik hek, Thianga ngei pawh hian Man’s search for meaning by Victor E.Frankl tih bu chu a keu ngun hle.
He BCom val hian,”MSL XI ah hian bung thar siamtu kan nih ngei ka beisei” tiin a teammate-te chunga rinna a nghah bur zia a sawi tel bawk.
Hoops Mania Timeout
Ropuia leh Thianga te hian a tumkhat nan ZBBC jersey an hâk dun turah hian an theihna sang tak karah mimal aia team an dah hmasak phawt chuan MSL XI ah hian MSL la champion ngailo kan hmu thei, hunin a la thup rih tih vel chauh a ni ta.
The special duo – ennawm han chhawpchhuak teh u khai.
MSL XI – Zemabawk BC hun? The special duo – Ropuia & Thianga!
