Daily Newspaper

MSSC Secretary kalchhuak tur an thlah

19

Karliamta Zirtawpni khan Mizoram State Sports Council (MSSC) Secretary kalchhuak tur C. Laltlanthanga chu MSSC-a thawktute’n Mual-lungthu Sports Complex-ah thlahna hun an hmang.

Thusawitu Sports Council Vice President V. Lalzawmliana chuan C. Laltlanthanga kaih-hruaina hnuaiah Mizoram sports-in nasa taka hma a sawn tih sawiin, infiammi chher-chhuahna kawngah leh sports association thawhhona kawngah sulhnu ropui tak a hnutchhiah niin a sawi.

Secretary kalchhuak tur chuan Mizoram State Sports Council-a kum 25 a awm chhung chu a dam chhunga a hun tawn ropui leh chanchin ngaihnawm ber a nih thu sawiin, Secretary hna a chelh chhunga hlawhtlinna hrang hrang an neihte chuan a tihhlim thu leh thawktu la awm mekte fuihna thu a sawi bawk.

Thlahna hun hi H. Lalremliana, chairman, Staff Welfare Committee-in a kaihruai a, thawktu hrang hrangte’n thu an sawi a; Staff Welfare Committee chuan a tih thin danin voluntary pension-a chhuak tur C. Laltlanthanga hnenah sumfai Rs. 50,000 leh ngaihhruina thuziak an hlan a, hemi hnu hian intihlimna hunte hmangin tlaiah zanriah an kilho nghal.

C. Laltlanthanga hian kum 1995-ah Mizoram State Sports Council zawmin, hemi hma hian Aibawk Middle School-ah headmaster hna a thawk thin. Kum 2001-ah a ngheta lutin Sports Promotion Officer hna a chelh chho a, Sports Promotion Officer atang hian kum 2009-ah Sr. Sports Promotion Officer-ah kaisangin, kum 2012-ah Secretary hna a chelh chho leh ta a ni.

Hnaa inpe zo, harsatna lam aia thawh theih dan kawng dap thin a ni a, Mizorama Office hna thawk chak ber mai ni lo, India rama thawk chak ber kan ni tur a ni tiin tan a la nasa em em a ni. A enkawl sports association leh staff-te fak a hlawh hle a, a hun chhungin hnuhma tha tak tak hnutchhiah a ngahin, khawvela infiamna inkhawmpui lian ber Summer Olympic-a Mizote kan tel ve theihna tur kawngah hma a la nasa hle.

NIS Patiala-ah kum 1987 khan Diploma Certificate Course zoin, judo coach a ni a, 3rd Dan Blackbelt a kai hman hial a; international referee ni thei turin Vietnam-ah exam a pass chhuak a, hun rei tak Mizoram Judo Association president hna a chelh bawk.
Sports hmasawnna eng-tinnge an kalpui tih hmuh a duh thin avangin mahni sum sengin a zin nasa hle a, Beijing Olympics 2008, Doha Asian Games 2006, Rio Olympics 2016-ahte kalin vawi engemawzat National Games leh North East Games-ahte a fehchhuak tawh bawk.

Tunah hian Mizoram Olympic Asso-ciation-ah Secretary General hna chelh mekin, Indian Olympic Association-ah hian associate executive committee member a ni m>k bawk.

Mizoram sawrkar chuan MSSC Secretary thar turin John |anpuia, MCS, tuna Joint Director, SYS chu a ruat fel tawh a, thla thar atangin a hna a zawm tan ang.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy