Site icon The Aizawl Post

MSSSB chairman ban phutin pungkhawm

Hna lak danah ram leilungfate duhsakna awm loa hma laa an ngaih Mizoram Subordinate Services Selection Board (MSSSB) chairman Lalrammawia chu an phut anga sawrkarin a ban loh avangin Nilaini khan Mizo Zirlai Pawl chuan a pisa kai tur dangin New Secretariat kawtah an pungkhawm.

Zirlaite hian MSSSB chairman chu Mizo thalaite duhsak tawk lo leh hnam thinlung pu loa Mizo thalaite hmakhua ngailoah puhin bang tura an duh thu an aurualpui a. MZP president Lalnunmawia Pautu chuan Mizo thalai thiam tak tak hna zawng mek an awm tih sawiin, Mizo thalai thiam leh hna hmu tlakte hnaa an luh ve zel theih chu MZP duhdan a ni tih a sawi. Tuna an punkhawm chhan, MSSSB hna lak chu state dang atanga dil theih a ni lo, tiin, “State quota a nih avangin Mizo ngei tling se MZP chuan a duh a. Chakma ADC angah te Mizo thalai tan tlin a harsat avangin state sawrkar hnalakah chuan Mizo ngei tling se kan duh,” a ti.

MSSSB-in tunhnaia hna a lakah hian hnamdang an awm thin avangin MSSSB chu tha takin MZP chuan tha takin a ngen a; Mizo thalai zingah hna zawng mek thiam tak takte lak theih dan kawng zawnga tang tlang turin an ngen tih MZP president hian a sawi a. Hetihlaia tunhnaia hnalakah hnamdang pathum an la leh chu hriatthiam har an ti a, sawrkar hna a van tawh avangin Mizo thalai thiam tak tak te hmakhua chu an ngaipawimawh tih a sawi a ni.

DP&AR-in Mizoram sawrkar hnalaka recruitment rules a neih mek chu siamthat ngai lai tam tak a awm thu leh sawrkarin siamtha thuai se an duh thu a sawi bawk.

Deputy chief minister Tawnluia chuan Nilaini khan MZP hruaitute hi kawmin, an lungawilohna lantir mek chu chawlhsan turin a ngen a. MZP-in rawtna hrang hrang a thlente chu sawrkar ngaihtuahnaa awm mek, department ang pawha hma lak an tumna a nih thu a sawi a. MZP hlauhthawn zawng zawngte thleng lo tura hma lak a nih dan turte a sawi a ni.

MZP chuan sawrkar hmalakaah lawmna tur a awm lo nia hria in, vawiin – February 2 hian MSSSB chairman pisa kai tur dan chhunzawm an tum tih an sawi a. Awmzia a neih loh fo chuan February 3 hian MSSSB chairman ban ngiatin Aizawlah kawngzawh an tum.

Exit mobile version