Mizoram Subordinate Service Selection Board thiat rih lo tura ngenna, Assembly House-a putluh chu member tam zawk duh danin a tlang zo lo. He Board-a thawktu leh thildanga senso zat hriat dan chu treasury leh eptu bench hriat dan a inang lo thung.
MNF member Lalrintluanga Sailo resolution putluh “Mizoram Subordinate Service Selection Board (MSSSB), Mizo thalai hnazawng mekte tana rintlak leh tangkai tak thiah tak hi sawrkarin ennawn leh rawh se” tih chu Zirtawpni khan Assembly Session-ah sawi ho a ni a. A puluttu chuan thalai hna neilote tana langtlang leh rinawm taka hna thawk thin MSSSB hi ennawn leh se a duh tih a sawi a. MPSC hna lak tura dah chu sawrkarin a phalsak hnu ah pawh lak theih lawk a nih thin loh avangin, sawrkar chuan kum 2019 khan Group B non gazetted bik buaipui tur Board hi a din ta tih a sawi a.
“Rules leh regulation fel taka inhungin, sawrkarin direct-a a control theih loh turin thuneihna hran fel tak a pe a. A hautak lo thei ang berin, chairman leh member pakhat la in, interview hunah DP&AR lam ami pun zel turin kalpui a ni. Sawrkar hnathawk mek promotion, regularisation leh upgradation mamawhten a hun takah an chhawr tangkai em em a, hna zawng mek lehkhathiam ten merit in hna an hmu ta zel a ni,” a ti.
Member 24-in House-ah an sawi a. Leader of the opposition Lalchhandama Ralte chuan sawrkar hnathawk, Group B non gazetted ten an chhawr tangkai em em MSSSB hi thiah tuma sawi thin pawh nise, sawrkar atanga reilote chhunga an thut hnua thuthlukna siam mai loin, sawrkar an thut hnua an tarmit atanga thlir a, siamrem ngai siamremin nghah deuh nise, a tuartu turte awm dan tur pawh zirchian tha a ti tih a sawi.
“Thil fair lo, zawhna set dan dik lo, zawhna putru tih angte complain pakhatmah ala awm lo. MPSC thuamthatna tur pawh la tih hmaa a aia lian zawk pek hi thalai hna zawng lai leh sawrkar hnathawk mek pawi kan sawi dawn,” a ti a. Ruling lamin MSSSB-in hna 3018 la hman nia sawi pawh a dik loa, research ti nia insawi sia an hre dik lo lutuk chu pawi a tih thu a sawi a ni.
DP&AR minister K Sapdanga chuan MSSSB chairman turin All India Service leh Central Civil Service zingah diltu an awm nual laiin, ruling party adviser chu chairman-ah atling nawlh. A function tan tirhah file inthen dan tur siam mumal loh, MPSC nen file inchuh leh inhnawn a awm a, hnalak pawh engemawchen a khaihlak phah tih a sawi. MSSSB-in hna a lak dawnin politician-te an inrawlh, tiin RTI-a zawhna chhan a ni tih a sawi a. “MPSC-in indaih loh thu sawi loa, a puitu body dang ruat tura ngenna an nei loa, politic atanga a puitu tur ruat hi a hlauhthawnawm hrim hrim. MPSC pawhin tul a tih loh a ni a, executive body-in a din leh tihdanglam theih, thalaite career innghahna atana siam hi a him lo,” a ti.
House leader Lalduhoma chuan MPSC leh MSSSB neih tlan a buaithlak chhan chu a hna inang si lo, exam hun inrual a awm thin a, chu chuan hna zawng mekte a tibuai hle tih a sawi. Constitutional body ni lo, executive-in duh duha a sawisak theih chu rilru thianghlim vak lo pu nise, an thiat phal dawn lo tiin, “Chhawr zui ve kan chak ngawih ngawih zawk ang. Hetiang nena innghen reng kan duh lo zawk a ni,” a ti. MSSSB chu an pawng thiah dawn loa, MPSC an thuamchak dawn tih sawiin, MSSSB thiah vang hian hna zawng lai emaw thawk lai emaw tumahin an tuar dawn loa, ruahmanna an siam tih a sawi bawk.
MSSSB a hriat dan inang lo:
8 DP&AR minister K Sapdanga sawi danin, thla tina he Board senso chu Rs. 11,02895 a ni a, kum khat chhunga senso chu nuai 132 a ni. Sum dinhmun avang pawhin he Board hi lo chawl rih se, constitutional body awmsa tihchak chu sawrkarin tha a ti a. MPSC mamawh chin chu chhawmluh tel a ni thung dawn tih a sawi.
8 Resolution puluttu Lalrintluanga Sailo chuan ZPM sawrkar hnua RTI hmanga an zawhna MSSSB chhan danin, thla khata an senso chu Rs. 1,41,300 a ni a. Thawktu tam zawk hi department dang atanga pawhkhawm niin, chairman leh member pakhat enkawlna atana hman ani ber.
8 Ruling bench lam sawi danah MSSSB din a nih atanga hna buaipui hi 3018 tih a ni. MNF Legislature Party member te sawi danin, direct recruitment-in hna 328 an la a; limited departmental exam-ah 149, departmental exam pangngaiah 52, Group B non gazzeted-ah 3097 tifel hmanin, regularise turin recommendation 166, confirmation 1355, conversion 43, absorbtion recomend 43 a ni. MSSSB hnathawh chhawrtu hi 5233 an awm tawh.
MSSSB thiah duh lamah tlu An senso hriat dan inanglo
