MSU-in college zirtirtu qualify lote
hun pawtsei tawh lo turin an ngen
Mizo Students’ Union chuan college zirtirtu zinga qualify lote chu sawrkarin an contract tawp hnu ah pawhsei sak tawh lo tura an ngen bakah heng zirtirtute chu harsatna siam loa tawp zui ngam turin an chah tih an sawi.
MSU Gen. Hqrs. hruaitute chuan college zirtirtu qualify lote chungchangah Higher & Technical Education minister Dr Vanlalthlana an hmu a. Nikum atanga an nawr, qualify lote ban an nih theihnana kawng hial zawha hma an lakna kalzelah, High Court stay order avanga tun thlenga qualify loten zirlaite an la zirtir chu pawi an tih thu an thlen.
College zirtirtu qualify lo te an contract period kumin February 28-a tawp turah, pawhsei a nih loh tur thu minister-in notification a tichhuak chu lawmawm an tih thu an hrilh a ni.
Qualify lo chunga college zirtirtu nih tum tlat chu thil zahthlak a ni a, asst. professor qualify lote pawh zirlaite hmangaihna avangin harsatna siam loa tawp zui ngam turin an chah tih an sawi. Unqualify-te contract a tawp veleh zirlaiten an tawrh lohnan an aiawh a hma thei ang bera lak la turin minister hi an ngen tih an sawi bawk.
Dan ang thlapa RUSA kaltlanga assistant professor lakten tun thlenga an dikna chanvo an la hmu lo chu pawi an tih thu MSU hruaitute hian sawiin, hei vang hian tuna MPSC-in asst. professor a lak turah pawh a tam zawkin dilna an thehlut a, an tlin chuan an post an kalsan a ngai dawn a, an post kalsana an aiawh lak theih loh tur chu zirlaite harsatna thlen thei a ni a, MPSC-in asst. professor a lak turte a interview hma ngeia RUSA kaltlanga lakte hi sawrkar hnuaiah tinghet turin H&TE minister hi an ngen tih an sawi a ni.
MSU-in college zirtirtu qualify lote hun pawtsei tawh lo turin an ngen
