Kumin Zirtirtute Ni denchhenin Mizo Students’ Union leh National Students’ Union of India Mizoram State chuan a hrang ve vea thuchhuah siamin zirtirtute chibai an buk.
MSU Gen. Hqrs thuchhuak chuan, Mizo zirlaite aiawhin zirtirtu zawng zawng zahna chibai a buk tih sawiin, ‘Zirtirtute hi ram leh hnam tana lunghlu thami, hriatna leh thiamnate midang hnena hlanchhawng zeltu mi pawimawh tak an ni a. Zirlaite pawhin kan zirtirtute hi ngaihhlu lehzual turin kan inchah a. Kan ram leh hnam tana mi chhenfakawm tak tak chherchhuaktu an nihna hi MSU chuan hlu a ti takzet a ni,’ a ti.
NSUI Mizoram State thuchhuak chuan zirtirtu zawng zawng zahna chibai a buk tih a sawi a. Kan rama zirtirtu, tuna zirtir hna thawk mek leh pension tawh leh boral ta zawng zawngte, ram leh hnam tana rim taka zirtir hna an thawhnate an hrereng tih a sawi. ‘Kan ram leh hnam innghahna chu kan zirtirtute in ni a, nakin lawka kan ram leh hnam kaihruaitu tur zirlaite hi tuna kan zirtirtute kuta awm an nih zia kan hrereng a. In theihtawpa he ram leh hnam tan, in thiam, in finna chhuah zel turin duhsakna sang ber kan hlan che u a ni,’ a ti.
MSU leh NSUI-in zirtirtute chibai buk
