Mamit thlang Tuidam bula leimin chu Inrinni khan sawrkar laipui Ministry of Road Transport and Highways North Eastern Region Zone V chief engineer Er Aditya Prakash chuan a hmunah a enfiah a. Ministry official dangte leh Mizoram PWD (Highways) hotuten an tawiawm.
Mamit thlang Tuidai kawng hi kumin August 23 – 27 zan ruahsur nasa avang khan a min a, leimin hi kawng ko atanga a mual tla thla a ni a, thenfai leh siamthat hna a hautak avangin engti anga hma lak tur nge tih a hmuna en an ni.
Khawthlang tlangdung panna leh inkalpawhna kawng pawimawh National Highway 44-A leimin hi MoRT&H atangin a thenfai hna thawh a ni dawn a, thlakhat chhungin lei leh lung tla paihfai tum a ni dawn. Khawl tam zawk hmanga hna thawh a ni dawn tih thuneitute hian an sawi a, a kawng chhuat chulmam leh thawmthat hna erawh NH 44A contract work atanga thawh tum a ni tih sawi a ni bawk.
Leimin chungchangah Mamit SDO (Sadar) Carolyn LB Khiangte kaihhruaiin Inrinni vek khan Sub- Hqrs. YMA Mamit hruaitute chuan PWD thuneitute hi an kawm a, leimin hian khawthlang tlangdung inkalpawhna lamah harsatna nasa tak a siam avangin kawng thenfai hna chak taka kalpui tura an ngen bakah tuna inkalpawhna kawng awmchhun, Mausen kawng hlui chu a thawmthat hna thawh sak thuai turin thuneitute hi an ngen a ni.
Mual a tawlh avanga kawng hnawh mek then dan tur en
