Champion lai Muana Veng an chak
CYMA leh Mizoram Volleyball Association (MVA) te buatsaih LBS Suzuki Avenis, 24th Inter Branch YMA Volleyball Tournament 2026 chu Ningani khan khelh chhunzawm a ni a, champion lai Muana Veng Br. YMA in Thanglailung Br. an hneh.
Champion lai Muana Veng hian Thanglailung lakah an khel tha viau a, set thum an khelh chhungin harsatna lian an tawk lo. An khingpuite hi set khatnaah khel tha tha thawkhat viau mah se set hnihna atangin an nawi ta tlat thung. Muana Veng hian point thuma sang fal chungin set khatna an la, Set khatna harsa angreng viau mah se set hnihnaah an khingpuiten point 18 chauh an hmu ta thung a, set thumnaah phei chuan Thanglailung hian point 12 bak an hmu thei tawh lova, champion lai leh champion leh tura rinkai Muana Veng hian point 25-23, 25-18, 25-12 in hnehna an chang a, second round an inhlangkai.
Ningani a inkhel ngaihven hlawh dangah Biate Br. YMA chuan harsa takin an khingpui Bunghmun Br.YMA an hneh. Biate hian Bunghmun lakah bul tan thain set la hmasa bawk mah se set hnihna an hloh ve thung a, set hnihnaah hian point 18 chauh an hmu. Set an hloh hnuin set thumna an la let leh a, chak an hnaih viau tawh. An chak mai tura ngaih a nih laiin set thumnaah point 20 chauh an hmu. Set hnih ve ve an lak hnuin deciding set an khel chhunzawm. Deciding set hmuhnawm takah Biate an chungnung zawk a, Bunghmun lakah hian point 25-20, 18-25, 25-23, 20-25, 15-11 in an chak a, harsa takin second round an inhlangkai a. Second round-ah fiahna lian an hmachhawn leh ang.
Muana Veng an chak awlsam
