Daily Newspaper

MUANNA DAR VAW TUTE HI FAK TLAK AN NI

11

-Lalthangfala Sailo

Tunlai khawvela hri chhe leng hian Zoram pawh a rawn thlen ve tak avang hian ralkhel dar vuak hial a tul thinin an hria a. Zam pawh kan zam viau hlawm. He hri chhe hlauhawm tak mai hi engtia do tur leh dan tur nge ni ang tih hi kan mithiam ral do hmatawnga awmte hian an zir mek a, do dan pawh Mizoramah ngat hi chuan an thiam hle mai. Ramdanga he hri hi an do dante leh damlo an enkawl dante he chanchinbu zahawm takah ngei hian mithiam ten an rawn ziak kan hmu tawh a. Entawn tlak tak tak te pawh an ni mai thei. Heng mithiamte ziak lo pawh hi America leh Europe-ah te, Australia, New Zealand leh China-ah te he hri an vei dan leh an do dante T.V-ah kan hmu a. Sorkar lam chuan theihtawp an chhuah deuh vek a; mipui lamin sorkar an thlawp leh thawp loh dan erawh chu a inang vek lo.

Chanchinbua hrivei dan leh enkawl dan entawn tlak tak tak an rawn chhuah hi an tha hle hlawm mai. Amaherawh chu Mizorama he hri hlauhawm tak mai kan do dan hi chu khawvel zawng zawng entawn tlak niin ka hria. Hotu lian Minister atanga damdawi thiam leh damlo enkawltute zawng zawng hian he hri do tur hian theihtawp tak meuh chhuahin, mut mawh hnar mawhah an nei hlawm a. Damlo enkawltute ngat phei hi chuan an chhungte pawh a thla a thla tlawh thei lovin damlo enkawlna hmunah hripui karah, natna leh thihna karah nileng zankhua in an awm rei ta hle mai. Hei bakah hian veng tin khaw tinah, mahni hna tul leh eizawnna kalsanin ram leh veng a him nan mi tlawmngai leh thalai intelkhawmte chu chhun leh zanah an duty ngat ngat reng a. |henkhat phei chuan mahni in lum leh veng chhuahsanin ramri-ah chhawlbukah vaihmite leh thosi tamna hmunah, thlipui leh ruahpui hnuaiah; engkim huamin kan ram chhan him nan an riak lut ngat ngat thin a ni. Hetiang em em hian ram dang ti ve hi awm tak ang maw.

Hrivei an han hmuh chhuah apiangin kan mithiamte chuan khawi atanga an kai nge tih leh mi dang an kai chhawn theih dan tur, theihtawp chhuahin an chhui tawn a, hei hi tih dan tha leh fel tak a ni. Hrileng inkai pherh tur ven nan a thil tangkai ber a ni hial ang. Hei bakah hian hri kai an hmuh chhuahte chu, natna pawh lang chhuak lo mah se tihdam thuai an nih nan leh mi dang an kai chhawn zel loh nan damdawi inah enkawl turin a rang thei ang berin an hruai zel hi a tha takmeuh a ni.

An natna lang chhuak lo hri kai tawh si te hi, enkawl zui nghal vat ni lo se chuan, midang tam tak an kai darh ang a, an natna a lo lan chhuah meuh chuan anmahni pawh an lo chau hle tawh ang. Mahse an natna lan chhuah hmaa damdawi ina enkawl vat an nih vang hian, mi dang an kai chhawng lova, an mahni pawh natna tuar vak lovin damdawi in atangin tihdam an nih hnuah an chhuak mai thin hi a va han lawmawm em. Keini kum 80 chunglam te pawh hi dam tak leh zalen taka kan awm theihna chhan hi theihtawp chhuaha tihdamna hna thawktute vang a ni.

Heng hri hlauhawm dotute zawng zawng hi, minister atanga doctor, nurse te leh thawktu dangte leh volunteer dang zawng zawngte hnathawh ropui tak mai hi, Kohhran hote tawngtai sakna zarah, Pathianin mal a sawm a, tun thleng hian Mizoram chhungah he hri vanga thi hi an la awm lo. Heng hna hrehawm tak leh tihbaiawm tak thawktute inpekna hi hun lokal zel turah pawh Pathianin mal a sawm sak zelna turin Kohhran hote hian i tawngtai sak zel ang u.

(THE AIZAWL POST – Article)

The Aizawk Post

Full>> ePaper Subscribe

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy