Mizoram sawrkarin health care scheme thar a hmanah state sawrkar hnuaia thawk thin chawl ta – pensioner ho hamthatna, tuna he scheme kalpui meka awm si, sawrkar kum thara a thawh hnihna hman tura awm tawh lo tur a awm nual dawn.Mizoram State Health Care Society Governing Body thutkhawma rel angin, MUHCS 2.0 ah hian Mizoram sawrkar hnuaia pensioner-te tan an kawppuite tih loh, an chenpui dang ration card-a langte inenkawlna senso an bill thei tawh dawn lo a. MUHCS 1.0 a pensioner zawng zawng he scheme zawm tir nghal chu a tharah hian tihtawp niin, MUHCS 2.0 ah chuan pensioner-te hian an duhthlanna in an zawmin an zawm lo thei tawh anga, an zawm duh chuan thla tin subscription fee Rs.1000 pe in an zawm thei ang. An zawm a nih chuan kum khat chhungin damlo inenkawlna atan cheng nuai 12 thleng an bill thei a, private ward-ah an awm thei bawk ang.
He pensioner scheme hian an chenpui zawng zawng huam tawh loin, kawppui an neih chuan an kawppuite chauh a huam thei a. Chhungkaw member dang chu an zawm duh a nih chuan, general beneficiary angin an inziahluh ve a ngai tawh dawn.
Nupaa Mizoram sawrkar hnuaia pensioner ve ve an nih chuan, a hranin he scheme hi an zawm a ngai a, an bill theih zat erawh tih pun niin, cheng nuai 24 thleng an bill thei dawn. MUCHS 2.0 hi an zawm duh lo a nih chuan Central Civil Services (CCS) Pension Rules 1972-in a phal angin, sawrkar atanga medical allownces an dawn thin chu an dawng chhunzawm thei thung dawn a, MUCHS 2.0 a hamthatna erawh an dawng ve thei lo ang.
Duhthlanna vawi khat an siam tawh chuan, kum khat chhung an duhthlanna hi a nung dawn a, an duh thlan tawh hi kum khat hnu lama an sut emaw sawrkarin ruahmanna dang a siam emaw a nih loh chuan a kum leh atan pawh hman nghal theih a ni ang.
Kumin April hnu lama pension tur tan, an chhuah ve leh MUCHS 2.0 scheme-in pensioner-te a huam tir dan ang thoin he scheme hi an zawm thei anga, subscription fee pawh an chhuah thla hmasa ber atangin cut nghal a ni ang.
Hetihlai hian Governing Body ruahman angin, CSS employee ang chi ho chu, scheme kalpui laia tum khata an sum pek tur an pek kha tunah chuan tum hnihin an pe thei anga, an inziahluh ngei ngei erawh a ngai dawn thung. An chenpui an chhungte chu Central Services (Medical Attendance) Rules angin declaration siam a ngai dawn a ni.
MUHCS 2.0 hi kumin February 16 atanga April 15 thleng online-a inziahluhna hun hawn a ni a. Internet that lohnaah chuan Sub Centre /health worker-te kaltlangin offline-a kalpui a ni. Hetiang hi khaw 200 chuang awm nia ngaih a ni. Common Service Centre atanga online-a inziahluh theih turin Information Communication & Technology department lam pawh hma laksak tura ngen an ni.
MUHCS 2.0 ah pensioner ho hamthatna awm hlih thensak
