Tun thlengin Mizoram Universal Health Care Scheme (MUHCS) hmangtu mi 31263 an awm tawh a, an inenkawlna senso atana tumsak tawh zat chu cheng nuai 4200 chuang a ni tawh. Thawhlehnia Mizoram State Healthcare Society (MSHCS) official website – mshcs.mizoram.gov.in hawnnaa MSHCS chief executive officer Dr Lalhriatzuali Ralte sawi danin, MUHCS hnuaiah hian kumin April 1 atanga tun thlengin Mizoram chhung hospital-ah mi 30565 inentirna man tumsak tawh niin, Mizoram pawnah mi 698 inentirna man tumsak an ni tawh. Heng mi 31263 inentirna man atana MUHCS-in a tumsak tawh zat hi a vaia belhkhawmin Rs. 42,06,73,812 a ni.
Kumin April 1 atanga tun thlengin Mizoramah empanelled private hospital 11 leh private day care centre 3 an awm a. Mizoram pawnah empanelled hospital 25 awmin, deemed empanelled hospital 13 an awm bawk.
Website hawngtu Health & Family Welfare minister Lalrinpuii chuan hlawhtling takin MUHCS kalpui zel a ni a, chhawr tangkai tam tak an awm tawh tih a sawi a. Cashless system hman a nih avangin chhungkaw tam tak phurrit a chhawk a, he scheme zawmtu, empanelled hospital pawh an awm nual tawh a, mipui leh sawrkar hnathawkte pawh empanelled hospital-ah zel in-admit turin a chah.
MUHCS hnuaiah hian state pawna inenkawl turte tan Medical Board paltlang tul tawh mah se, refer kawngah harsatna a awm dawn loa, thil mumal taka kalpui duhna vang zawk a ni tih Health minister hian a sawi a. Emergency case-ah phei chuan awlsam taka kalpui a nih theih dan ngaihtuah zel a ni dawn tih a sawi a ni.
MSHCS website-ah hian MUHCS chungchanga zawhna tam tak awm thin, empanelled hospital awm zat, MUHCS kalphung leh MUHCS chungchanga thuthar apiang rang takin a hriat nghal zel theih tawh dawn a ni.
MUHCS hmangtu 31263 awm tawh
