Daily Newspaper

Murray a chak hram

17

Flushing Meadows-ah US Open khelh mek a ni a, a ni hmasa berah World No. 1 hlui Andy Murray chuan inlehthalna lian a thlentir a, set hnih a hloh hnuin Yoshihito Nishioka a hneh let. Harsa taka Murray a chak hram lai hian champion tura rinkai Medvedev chu nuamsa takin a chak ve thung.

Murray ding chang
Hun rei tak chhung hliamin a tihbuai vanga rinkai ni phak lo Andy Murray chuan ni 596 zet hnuah Grand Slam-a mimal inelna a hmachhawn a, a tlawm ngal teuh hle. Murray hian Yoshihito Nishioka a hmachhawn a, bul a tan che hle. Set khatnaah Nishioka hian break a neih chhawr tangkaiin 6-4 in sete a la a, bul a tan tha hle. Set hnihnaah pawh 6-4 thoin a chungnung zui leh a, hnehna changa second round lut ngei tura ngaih a ni hman.

Set hnih a hloh vanga dinhmun chhe taka ding Murray hi a insiamtha a, huaisen taka inlan in, inkhel hautak a hmachhawn zui. Set thumnaah an inhnehtawk hle a, chak zawk tur rinthiam harsa khawpa a inbeih hnuin Murray hian 7-6 in set a la hram a, a him phawt. Set linaah pawh an inhnehtawk leh pek hle a, tie-break-ah bawk Murray chungnung zui leh in, 7-6 bawkin a chungnung a, set hnih a la zawn a, deciding set khelh a ngai zui ta a ni.

Set pawimawh leh boruak sang takah tawnhnriat nei tha Murray a che fuh a, break a neih chhawr tangkaiin 6-4 in set a la a, hnehna pawimawh ta a chang. Murray hi tla ngei tura ngaih a ni hman a, tha takin a er let a, a khingpui lehtalin second round a inhlangkai ta a ni. Murray hian January 2019 khan hliam a tuar a, he a hliam vang hian a bawksawp reng a, tun hi Grand Slam-a mimal inelna a hmachhawn lehna hmasa ber a ni a, chetha leh turin rilru leh taksa a fit tawk tih a lantir a, chak vanga lawmin a mittui a luang ta hial a ni.

Medvedev chak nuamsa
2019 final-ah uiawm taka Rafael Nadal laka tlawm Daniil Medvedev chu nilaini khan a vawikhat nan a inlan a, Delbonis lakah chungnung taka inlan in, set hloh lo vin a chak.

Medvedev hian tha takin bul a tan a, set khatnaah game khat chiah hlohin set a la. Set hnihaah 6-2 in a chak zui leh a, set thumna harsa hlek mahse break a neih chhawr tangkaiin 6-4 in set a la zui leh a, nuamsa taka hnehna changin second round a lut. Medvedev hi champion tura rinkai zing a mi a ni a, champion tura rinkai ber Novak Djokovic kawng dal thei tur zinga rinkai zinga mi a ni.

Venus a thim
Tualchhung player, tawhkhirh pawl tura ngaih Venus Williams chu first round paltlang zo lovin a tla a, Venus eng a thim nghal. Veteran player Venus hian Muchova a hmachhawn a, set lak nei lovin a tlawm. Set khatnaah Muchova hian 6-3 in set a la a, set hnihnaah 7-5 a set la zui lehin second round a inhlangkai a, vawihnih champion tawh Venus Williams a vawtla. Venus William hian vawi engemawzat US Open a lo hmachhawn tawh a, tun tum hi second round a luh phak loh awmchhun niin hun chhe tak a tawng.

(THE AIZAWL POST – Infiamna)

The Aizawk Post

Full>> ePaper Subscribe

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy