World number one hlui Andy Murray chuan thawhkan a harsat bawk a, tun dinhmuna a ranking luah pawh 49-na daih ni tawhin, thla hmasa Australian Open-a first round a paltlang zawh loh hnuah a la insiamtha zo ta rih chuang lo a, Marseille khawpuia khelh mek Open 13 Provence-ah pawh second round lut lo zawng bawkin a khawsa leh tawh!
Briton hi world number 66 Tomas Machac chuan 7-5 6-4-in a hneh a; ti hian, kumina match li a khelh tawhah a la tlawm fai vek a ni!
Thla hmasa khan Murray hian dinhmun chhe taka a din thu leh chanchinbu lamin tennis chawlhsan hnai ang mai an tarlan thu sawiin, chuti chung chuan chawlh mai a la tum loh thu a lo sawi-chhuak tawh a, mahse, thla tharah pawh chak ni hmel hmu lo zawng bawkin a la phar buai chhunzawm ta zel rih a nih hi!
France rama Scot hneh loh Czech Machac kha kum 23 mi chauh la niin, Murray laka a result kha a career-a hnehna lian ber a la ni.
Thawhlehni khan British hmeichhe num-ber one hlui Heather Watson chuan Abu Dhabi Open-ah hnehnain tournament bul a tan ve thung a; Russian ninth seed Veronika Kuder-metova laka 6-3 7-5 hnehna a sualchhuah kha a tun hnaivai career-a a match khelh tha berte zinga mi a ni.
Abu Dhabi Open first-round hnehna hi ranking thlirna atang chuan kum 2017 hnu lama Watson-i chetthat ber niin, a chhan pawh a hneh nu Russian Kuder-metova kha WTA ran-king-a 16-na luah mektu niin, British number one hlui aiin step 140 zetin a sang zawk a ni.
Watson hian main draw thleng tura quali-fying akhelh laiin 2020 Australian Open cham-pion Sofia Kenin pawh a lo paltlang tawh a, first round a paltlang leh hnuin Grand Slam champion a hneh thei khan a hmabakah inrintawkna a siamsak tur thu a sawi.
Abu Dhabi khaw tournament inkhel dangah Naomi Osaka ‘comeback’ kal lai erawh a tluang lo leh tawh a, first-round paltlang lo zawngin American Danielle Collins chuan Japanese nu hi 7-5 6-0-in a hnawtchhuak.
Tarlan tawh thin angin, world number one hlui Osaka hian nikumah a fa hmingkoh a hring a, chumi hnua khelmual a luh vawi-khatna atan January thla tir lam khan Brisbane International-ah a inlan a, first round-ah a tlawm nghal a; Australian Open-ah pawh second round lut zo lo zawngin Caroline Garcia hneh loin a tlawm a; tunah ti hi ni lehin, a nau neih hnua tournament hrang pathum behchhana khelmual a luh leh vawithumah a la chak lo fai vek a ni.
Transylvanian Open lamah Britain player Harriet Dart chuan second round lut turin Hungarian Anna Bondar lakah 6-4 7-6 (7-0) hnehna a chang.
Murray-a season chhia a kal tluang zel rih!
