Daily Newspaper

Murray leh Nagal an tla

9

Tennis hmanga inelna ngaihhlut hlawh zual pali zinga pakhat; US Open 2020 khelh chhunzawm zel a ni a. World No. 1 hlui Andy Murray chu Felix Auger-Aliassime hneh lovin a tla a. India No. 1 Sumit Nagal chu champion tura rinkai Dominic Thiem hneh lovin a tla ve bawk.

Hun rei tak hliamina tihbuai hnuah Andy Murray chuan mimal inelna a hmachhawn ve leh tan a, first round-ah paukhauh takin inlan bawk mahse kum 20 mi Felix Auger-Aliassime lakah a che hleithei lo thung a, set khatmah la lovin a tlawm a, third round a inhlangkai zo lo.

Canadian rawlthar Felix Auger-Aliassime hian Grand Slam-a vawinga champion tawh Murray hi a ngam hle a, first round ang bawkin mit la takin a inlan zui leh. Auger-Aliassime hian set khatnaah game hnih chiah a hloh a, a khingpui hi a thunun hneh nghal nghe. Set hnihnaah Murray a khel tha hret a, game thum la in, 6-3 in hnufual zawkah a tang zui leh. First round-ah set hnih a hloh hmasak zet hnua hnehna chang let Murray hian inlehthalna thlentir leh ngei tumin tan a khawh a, a che tha chho telh telh a, game a la tam telh telh. Set linaah khel tha hret mahse game li bak a la thei chuang lova, 6-4 a chungnung zawk Felix Auger-Aliassime chuan set hloh lova hnehna changin third round a inhlangkai a, Dan Evans leh Corentin Moutet te inkhela chak zawk zawk a hmachhawn zui leh ang.

Evans leh Moutet te hian set thum lai an khel hman tawh a, Evans hi 4-6 6-3 6-5 hnu fual zawkah a tang mek a, ruah surin a tihbuai vangin an inkhel chhunzawm thei lo. Evans hian chak turin insiamthat a mamawh a, British player te an tlak hma hlawm vangin Evans hi an beisei nghahna pakhat a ni mek a ni.

Inkhel dangah India chhuanvawr, India No. 1 Sumit Nagal chuan Australian Open finalist Dominic Thiem a hmachhawn a, Austrian second seed a la ter phak lo deuh tih a tilang a, a piancham phaphak vawi 27 na hnehna nen ngei lawm a tumna hlawhchham a, a puanthuah a tel mai a ngai ta thung.

Thiem hian India tlangval Nagal hi a tir atanga a tawp thlengin a thunun tluan a, 6-3 6-3 6-2 a hnehna changin third round a inhlangkai. Thiem hian third round-ah khingpui hautak tak nei in, fiahna a hmachhawn a ngai dawn thung a; 2014 champion Marin Cilic a hmachhawn a ngai dawn. Cilic hian a khingpui Norbert Gombos chu 6-3 1-6 7-6 (7-2) 7-5 a hnehin third round a lut.

Inkhel dangah Vasek Pospisil chuan a hnampui Milos Raonic a lehthal a, 6-7 (1-7) 6-3 7-6 (7-4) 6-3 a hnehna changin a hnawkchhuak ve thung. World number 94 Pospisil hian 6-3 3-6 6-3 6-4 a Miomir Kecmanovic hnehtu Spanish eighth seed Roberto Bautista a hmachhawn zui leh ang. Kum hmasaa finalist Daniil Medvedev chuan 6-3 6-2 6-4 in Christopher O’Connell a paltlang ve bawk.

(THE AIZAWL POST – Infiamna)

The Aizawk Post

Full>> ePaper Subscribe

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy