Myanmar atanga opium tharchhuah chu sang zual zelin kum kua chhunga a san ber a thleng tiin UN chuan a sawi.
Kum 2022 khan 795 metric tonnes lai a tharchhuak a, chu chu kum 2021-a 423 metric tonnes a tharchhuah aia a let hnih dawn a ni.
UN chuan opium tharchhuah tamna chhan hi economic lama harsatna nasa tak leh ralmuan loh vang a ni a, chutih rualin heroin siamna opium resin khawvel huapa a san zual zel vang a ni bawk.
Kum 2021 khan Myanmar sipai te chuan sorkar paihthlain chumi hnuah civil warin a zui chhunzawm ta reng a ni.
“February 2021-a sipai ten sorkar paihthla leh economic leh security lama ngialngheh loh zuina te chu a intawk khawm a, chu chuan loneitu hmun kilkhawr leh ralmuan lohna hmun northern Shan leh ramri hnaiha cheng te chuan opium chin leh mai bak duhthlan tur an nei lo” tiin Jeremy Douglas, UN Office on Drugs and Crime (UNODC) regional representative chuan a sawi.
Myanmar, Thailand leh Laso inri tawnna ramri hi Golden Triangle tih a ni a, tun hma atang tawha opium leh heroine tharchhuahna leh thawnchhuahna hmunpui a ni.
Ningania UN report tihchhuah chuan Myanmar economy chuan kum 2022 khan ram pawn leh chhunga thil tleng vangin nghawng nasa tak neiin – Russia-Ukraine indona te bakah politics ngelnghet lo leh inflation sang nasa te chuan loneitute chu opium puppy an chinna tihzau mai bak duhthlang theiin a siam lo a ti bawk.
Myanmar hi Afghanistan tih loha opium tharchhuak hnem ber ram a ni a. Heng ram pahnih te hi khawvel puma heroin hralh chhuaktu lian ber te an ni. Myanmar opium economy hlut lam hi $ 2 billion vel zet niin UN chuan a chhutsak a, helai bial vel rama heroin trade value chu $ 10 billion vela chhut a ni thung.
Tun hnai kum sawm chhungin crop substitution project kalpui te leh Myanmar economy tha chho zel avangin opium poppy chin chu nasa takin a tlahniam a.
Mahse tunah erawh a sang leh ta a. UN-in survey a neihnaah Myanmar-a opium chin chu sang lehin kum 2022 a Opium tharchhuah chu kum 2013 hnua a san ber tum niin 870 metric tonnes vel lai tharchhuah a ni a ti.
Sipai sorkar pian leh hnuah UN chuan synthetic drug production nasa zawkin a thlithlai a. Heng opium te hi Myanmar border area a armed group hel pawl te sum lakluhna ber a ni bawk.
Opium chu synthetic drugs te aiin labour mamawh tam fe a ni a, hei vang tak hian sorkar paihthlaka sipai sorkar pian hnuah hna vang zui avanga sum mamawhna phuhruk tho ngai si te tan chuan itawm tak a nih phah a ni.
Nikum khan opium chingtute chuan opium kg khatah $280 vel zel lalut ang an ni a, hei vang tak hian opium chin chu hnawl theih a ni lova, demand a sang bawk si a, narcotics hrang hrang heroin, morphine leh codeine te chu opium a innghat vek an ni bawk si a ni.
Kum 2022 khan Opium chinna hmun chu nasa taka pungin 40,100 hectares lai a tling a, opium atanga thartchhuah pawh kum 2002 hnua a san ber tum a thleng bawk.
Douglas chuan Myanmar thenawm ram te chuan he thil hi an ngaihmawh a ngai a, thutlukna harsat tak pawh an siam a ngai dawn a ni a ti bawk a. Tun hma atanga opium lo ching tawh te pawh a nghawng ngei ngei a ngai dawna ti bawk a.
“A tawpah tak tak chuan opium chi hi economics vek a ni a, a thlai tihchhiat vek ngawta a chingtute harsat tak siam ngawt chu a chhanna a ni lovang” tiin Benedikt Hofmann, UNODC country manager for Myanmar chuan a sawi.
“Economic ngelnghet a awm theih nana duhthlan tur dang a awm chuang lo a nih chuan opium chin leh tharchhuah chu a lianin a zau zual zel ang” tiin a sawi bawk.
UNODC report chuan nikum khan Taliban sorkar in Afghanistan-ah opium chin a khap hnuah opium man chu nasa takin a sang zual a ni an ti bawk.