Tun hnaiah Myanmar atangin Paite engemaw zat Mizoramah an raltlan a, hriat theih chinah khaw thenkhatah chuan mi za chuang te an ni..
Raltlan lut tharte hi Mizorama Paite tia hriat, Myanmar leh Manipur hmun thenkhata Zomi tia hriatte an ni a, a hmaa tlanchhe ve lo khuate an ni deuh vek nia hriat a ni.
Lut tharte hi Champhai district-ah vek an lut a, Myanmar dep khaw paruk velah an lut a ni.
Hriat theih chinah Vaikhawtlangah raltlan lut thar hi mi 606 vel an ni tawh a, Hnahlanah mi 140 vel an awm thu an VC president-in a sawi.
May ni 17 atanga Chawlhni thleng khan a hlawmin raltlan hi Mizoramah an lut nia hriat a ni a, thu dawn danin, Khuangphah-ah mi 150 vel, Mimbung-ah mi 100 vel, Teikhangah mi 50 vel, Ngopa-ah mi 100 vel, Kawlbemah mi 50 vel an awm nia hriat a ni.
Myanmar atanga Mizorama tlanchhiate hi a hma chuan Myanmar sipai sorkar leh anmahni paih tumtute inbeih vanga ralmuang lova Mizorama lut an ni thin a, tuna lut tharte hi chu chutiang an ni lo tih thu dawn a ni.
Thu dawn danin, tun hnaiah Myanmar-ah hian Zo hnahthlak pawl pahnih- ZRA leh CNA kar a tha lo a, silai te pawh a puak. Tuna lut tharte hi chumi boruak vanga ralmuang lo chu an ni.
Raltlan luhna Hnahlan VC hruaitute chuan raltlante hi Hnahlan atanga khaw hnai, Tuimang, Zampui leh a chhehvel khuaa mi an ni tlangpui tih an sawi a, raltlante chuan Zampuiah an inkap tawh a, Tuimang-ah la inkap lo mah se inkap thei an ni tih an sawi tih an sawi.
Hnahlana raltlante hi a tam ber chu nunau leh hmeichhia an ni tih thu dawn a ni a, thalai chu in nghak turin an indah nia sawi a ni.
Myanmar atangin Paite raltlan awm thar
