Myanmar scam centre chhuahsante India-in hruai haw tum

Myanmar scam centre chhuahsante India-in hruai haw tum
Tun hnaia sipaiten Myanmar ramri hnaiha scam centre an luhchhuah hnuah Indian 500 velin an thenawm, Thailand an lut a, heng mite hi hruai haw tumin India chuan Thai thuneitute a dawr mek a, dan anga tih ngaite tihfel a nih hnuah hruai haw vek an ni dawn niin a buaipuitu pakhat chuan a sawi.
India hian a ram mite phurh haw nan hian Thailand-ah thlawhna tirh a tum nia hriat a ni a. Heng mite hi a tam ber chu KK Park an tih chhunga scam centre hrang hrang luhchhuahnaa mite an ni.
Thai Prime Minister Anutin Charnvirakul chuan an ram khawthlang lam Mae Sot-ah Indian 500 dawn an awm mek niin a sawi.
“Indian sorkarin a phurh haw nan thlawhna a rawn tir dawn a ni,” a ti.
Ministry of External Affairs (MEA) chuan Bangkok-a Indian embassy chuan Thai thuneitute dawrin ram mite hruai haw theih dan a buaipui tih a sawi.
“Indian-te hi Thai thuneituten an man pawhin ngaihtuah zel tho an ni ang,” tiin MEA thupuangtu, Randhir Jaiswal-a chuan a sawi.
“Tun hnaiah Myanmar atangin Thailand an lut a. Kan tum ber chu Thai thuneitute nen eng ram mi nge an nih tih finfiah leh hruai haw a ni a, Thailand-ah hian dan anga tihfel ngaite tihfel a nih hnuah hruai haw an ni ang,” a ti.
Myanmar sipaiten Thailand nena an inrina bul maia dan bawhchhiatna chi hrang hrang tihna hmun, scam centre tia an sawi mai an luhchhuah hnuah hian ram hrang hrang 28 vel mi 1,500 chuangin Thailand hi an lut nia hriat a ni.
Myanmar-a scam centre-te hi ram hrang hranga thlunzawm neia dan bawhchhiatna thil tihna a ni.
UN chuan heng hmunah hian ram hrang hrang mi, dan lova hruai luhte chu centre-ah hian sorkarin a duh loh thil ti tur leh thawk tura chhawr thin an ni a. Hetiang centre hi Cambodia, Laos, Philippines leh Malaysia-ah pawh a awm nia sawi a ni bawk.
May thlaa UN-in report a tihchhuahah chuan mi sual pawl zawmpui nei thui tak takte chuan khawvel hmun hrang hrang atangin mi bumin an hruai khawm thin a, heng centre-ah hian an tum loh deuh angin an chhawr ta thin niin an tar lang.
Sipaiten an luhchhuah hnua Thailand pan ta Indian zingah pawh hetianga bum chhuah tuartute bakah centre kalpuia a pawikhawihtute pawh an tel nia sawi a ni bawk.
March thlaah pawh khan India hian a ram mi 549 chu Myanmar leh Thailand ramri vela cyber scam centre atanga chhanchhuahte a lo hruai haw tawh bawk.