Tun hnaiah Commerce & Industries Department (Commerce Wing) hnuaia Assistant Marketing Inspector post khat lak tur, exam buatsaih hnuah cancel a ni a, MZP chuan hei hi mak an tih thu an sawi.
“Mizo Zirlai Pawl (MZP) General Headquarters chuan tun hnaia Commerce & Industries Department (Commerce Wing) hnuaia Assistant Marketing Inspector post khat (1) lak tur, Exam pawh conduct vek tawh hnua, interview tura koh te’n interview-na hmun tur an thlen vek tawh hnua hna lak an cancel thut hi mak a tiin, hriatthiam har a ti hle a. |halai hna zawng mekte zah lohna lian takah a ngai a ni,” tiin thuchhuah an siam.
An thuchhuaha a lan danin, Commerce & Industries Department (Commerce Wing) hnuaia Assistant Marketing Inspector post khat lak tur hi October ni 6, 2023 khan advertisement tihchhuah a ni a, Written Exam hi July ni 19, 2024 khan neih a ni. Written Exam beitu atangin mi 10-te chu September ni 10, 2024 zing dar 10-khan Commerce & Industries Secretary Room-ah personal interview nei tura koh an ni a, interview tura kalte’n anmahni koh hun an nghah mek laiin, hna lak hi cancel an nih thu leh application fee an lak let theih thu hrilh an ni ta a ni.
“|halai hna zawng mekte tihnual thei zawng leh tibeidawng thei tur thil hetiang a thleng ta mai hi MZP chuan a ngai thutak hle a. Thil thlen dan uluk taka chhui chiang a, a tisualtu lakah hremna lek ngei turin MZP chuan sorkar a ngen a ni,” MZP chuan an ti.
“MZP chuan thalai hna zawng mekte inbuatsaihna tithlawn tur leh rilru na taka siamtu hi hrem ngei a phut a. Department pawh hetiang thil lian tak an tihsual avangin ngaihdam dila, sawifiah turin MZP chuan a phut bawk,” an ti a, “MZP chuan tun hnaia Mizoram sorkar hnuaia hna hrang hrang lakah, dik leh felfai taka hnalak kalpui turin sorkar department hrang hrangte a ngen nawn leh a. Sawi neuh neuh awmte pawh a tul angin chhuizui a tum bawk. Mizoram sawrkar pawh hetiang thil dik lo ti thinte enzui tur leh, thalai hna zawng mekte ti beidawngtu na taka hrem turin a ngen nawn a. Puanzar a, na taka nawr innawr hmaa Zirlaite leh Thalaite hmakhua ngai hram turin a ngen bawk a ni,” an ti bawk.
MZP-in exam cancel mak ti
