MZP-in kum 90 tlin a lawm
Mizo Zirlai Pawl chuan October 27 khan an kum 90 tlin an lawm a, Zirlaite Ni an hmang nghal.
Mizoram hmun hrang hrangah an hmang a, MZP Gen. Hqrs. huaihawtin Aizawlah hman a ni. Kum 1935 atanga MZP president lo ni tawh hnenah chawimawina hlan an ni a. Tunhnaia thi, MZP president hlui Zokailiana Khiangte sunna hman a ni bawk.
MZP president Dr C Lalremruata chuan,hruaitu ni tawh zawng zawng chu MZP kal zelna tura ngaihtuahna seng thar a, MZP Pisapui lamah lawilut tam lehzual turin a sawm tih a sawi a. MZP kum 90 tlin theih chhan chu hruaitu hmasate thawhrah liau liau a ni tih a sawi.
Zirlai pawl a nih angin MZP-in zirna an ngaipawimawh rualin, nationalism an buaipui lo a nih chuan MZP chu engtikah mah a sang ngai dawn lo tih sawiin, “Zirna leh nationalism hi Mizo Zirlai Pawl innghahna, a lungphum a ni a, rualkhai taka a kal zel theihnan theihtawpa hma lak a tul a ni,” a ti.
MZP adviser Dr Vanlalremruata Tonson chuan Zirlaite Ni thupui – “Zirlaite Hmathlir” a sawizau a. MZP president ni tawh zinga damlai upa ber Prof JV Hluna (1977- 1978) chuan hruaitu hlui aiawhin thu a sawi a ni.
Zirlaite Ni puala Education minister Dr Vanlalthlana thuchah ngaihthlak a ni bawk.
Mizo Zirlai Pawl hi 1935 October 27 a din a ni a. MZP hmalakna in Mizoram sawrkar chuan October 27 hi ‘Zirlaite Ni’ atan a lo puang tawh a ni. R Buchhawna chu MZP Gen. Hqrs. president hmasa ber a ni.
MZP-in kum 90 tlin a lawm
