Daily Newspaper

MZP-in PM leh Union HM hnenah thlen

8

Mizo Zirlai Pawl chuan Prime minister Narendra Modi leh Union Home minister Amit Shah hnenah lehkha thawnin, Mizoram leh Assam police te loh theih loha an inkap chu pawi a tih thu leh inkahna thlen chhante a thlen.

MZP Gen. Hqrs. in Prime minister leh Home minister hnena ziaka thu a thlenah hian, 2021 July 26-a inkahna thleng chu Assam chief minister Himanta Biswa Sarma cho chhuah leh a hmalakna a nih thu te, chief minister a nih atangin thenawm state-te awm tha hle hle lai nasa taka a tihbuai dan te, state thenawmte vau leh tihthaih nana sipai lak belh leh state ramria commando thahnem tak dah a tum thu te chu MZP chuan tha lo a tih thu a thlen a. Ralmuang taka Mizoram mipui an awm lai a, Assam CM ruahman anga silai keng mi 200 rual leh ambulance nen Mizote a chawk buai duh chu, a thil tumte ngaihtuahin a rapthlak hleah a ngaih thu te a thlen a ni.

Assam official leh Assam police, thuam famkima inthuamten Vairengte daia state pahnihte intibuai tur veng tura neutral force (CRPF) te awlsam taka an paltlang tlang mai thei chu engti kawng maha hriatthiam chi a nih loh thu leh CRPF-ten an duty an hlen tawk loa ngaih a nih thu MZP hian thlenin, CRPF chungah Mizo mipui leh Mizoram sawrkar tan rinna nghah zui ngamna chi an nih loh thu a thlen bawk.

‘PM leh Home minister hnenah hian heng thil pahnih hi ngenna kan thlen nghal – state pahnihte inkara buaina awm thei veng tura Vairengte daia awm CRPF chungah inkaihhruaina dan lekkawh tur leh an tih tur awm tak an tih loh avanga an phu tawk hremna pe turin leh, Assam hian tam zawk an nih leh India ram zau zawk nena kan inpawhna kawtchhuah an nih chhuanga Bengal Eastern Frontier Regulation (BEFR) 1875-in inrina a siam pel min pawngnek fo lo tura khap turin,’ MZP thuchuak chuan a ti.

MZP Gen. Hqrs. thuchhuak chuan, he buaina kalzelah Mizoram MP Pu K. Vanlalvena’n national media-te hmaah na taka Mizo mipuite thlavang a hauh chu thlamuanthlak a tih thu sawiin, Assam sawrkarin hei hi ngaimawh a, a mimala Delhi thlenga umzuitu tur intelligence tirh a nih thu an puang chu MZP chuan a duh lo hle tih a sawi. ‘India ram rorelna in sanga Mizo mipuite aiawhtu kan MP chungah thil tha lo engpawh a thleng a nih chuan, kan MP thlavang hi na takin kan hauh zel dawn a, a chungah hian eng thil mah ti lo turin Assam CM hi kan hriattir a ni,’ a ti.

Mizoram leh Assam ramri buai chungchangah tunhma atangin Mizoten Assam state mi leh sate huan thlai tichhe zawng leh rikrap zawngin thil an tih ve ngai loh thu leh silai hmeh puah pawh kan duh ngai loh laiin, Himanta Biswa Sarma lo lan hnua Mizote chunga Assam mite chet fo dan tha lo tak tak chu engti kawng maha sawimawi chi a nih tawh loh thu an thuchhuah hian a tarlang bawk.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy