Daily Newspaper

MZP-in Saizawh ‘W’ leh Chawngte tlawh

25

Saizawh West mite leh Chakma thenkhat inkara thil thleng chungchangah Mizo Zirlai Pawl chuan Inrinni khan Lawngtlai district chhung Saizawh West hi an tlawh a, a hnu ah Chawngte-ah Chakma pawl hruaitute koin an inkawm bawk.

MZP hruaitute hnenah hian Saizawh NGO hruaitute chuan development-ah nasa taka thlim an nih dan leh hamthatna pek that ve an nih loh dan te, Chakma Autonomous District Council huamchin hnuaia Mizo awmte hmusit leh kutthlak an nih fo thute an sawi a. Mizoram sawrkar pawhin CADC huamchhunga Mizo khuate chu ngaihven tur leh CADC hotute hnenah pawh hma lakpui tura an duh thu an lo hrilh a ni.

Hemi hnu hian MZP chuan Chawngte-ah Central Young Chakma Association hruaitute koin September 3 tlaia Saizawh ‘W’ a Chakma thenkhat chetdan chu an duh loh thu leh a tul anga hma lak zui zel an tum thu te an hrilh.

Central YCA president Dr Joyti Chakma chuan he thil thleng hi pawi an tih thu leh Mizo mipui leh kuttuar chhungte chungah ngaihdam an dil thu a sawi a. Pawikhawihtu mante hi hrem ngei an duh thu leh MZP duh anga Mizo mipuite hnenah ngaihdam dilna an tih chhuah tur thu a sawi.

MZP hruaitute hian CADC chief executive member Rasik Mohan Chakma chu a chenna inah hmu nghal bawkin, Saizawh West-a Chakma-ten pawi an khawihnaah CEM a nih anga mawh phur ngam tur leh hliam tuar pawh CADC-in zangnadawmna pe nghal turin a ti a. CEM chuan MZP ngenna angin CADC chuan hliam tuar hnenah Rs. 50000 an pek tur thu MZP hruaitute hi a hrilh a ni.

(THE AIZAWL POST – Tualchhung)

The Aizawk Post

Full>> ePaper Subscribe

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy