MZP Inter HSS Volleyball Tournament

Nimin, Ningani khan MZP Inter Higher Secondary School Volleyball Tournament 2023 chu Aizawl West Joint YMA Multipurpose Hall-ah final khelh a ni a, school education minister Lalchhandama Raltein khuallian niin a hmanpui.
He tournament-ah hian Aizawl khawpui chhung atngin sikul 11 an chhuak a, chu’ngte chu – Govt. Central HSS, St. Joseph HSS, Govt. KM HSS, St. Pauls HSS, JL HSS, Greenland HSS, Oxford HSS, Staines Me-morial School, Marcus School of Education, Govt. Mamawii HSS leh Springfield HSS bakah Aizawl khawpui pawn atangin Khawbung HSS, Khawzawl HSS, Lungdai HSS, Sesawng HSS, Tlungvel HSS leh Thingsulthliah HSS an tel.
Springfield HSS hian mipa team an nei lo a; Govt. Central HSS (College Veng), Staines Memorial School (Chanmari), Marcus School of Educa-tion, Govt. Mamawii HSS (Mission Veng) leh Lungdai HSS Lungdaite’n hmeichhe team an nei lo ve thung.
Mipa inelnaah Govt. KM Higher Secondary School an champion a; pahnihna Central Higher Secondary School niin, pathumna chu Govt. Mamawii Higher Secondary School.
Hmeichhe lamah Khawzawl Higher Secondary School an thiam ber ve thung a; final-a chak zo lo JL Higher Secondary School chuan dawtin, St. Joseph Higher Secondary School chu pathumna an ni.
Mipa Best Spiker atan H. Mal-sawmsanga (KMHSS) thlanchuah niin, hmeichhiaah Chinglunkimi (JLHSS) thlan a ni.
Mipa Best Setter atana thlan chu Lalchhanhima (KMHSS) niin, hmei-chhe lamah Lalthakimi (Khawzawl HSS) thlan a ni ve bawk.
Minister chuan MZP-in zirlaite talent haichhuahna’n leh an thiamna (skill) phochhuahna hun tha a siamsak chu zirlaite vannei a tih thu sawi chungin, “New Education Policy (NEP) 2020 kan hmang tan mek a, hei hian infiamna (sports) a rawn ngaipawi-mawh thar hle a; tunhmaa CCA-a ngaih thin kha tunah chuan zirna chhungah a rawn khung tawh a ni.
“Tun sawrkar kal mek pawh hian infiamna hlutzia hre chung leh infiamna chu eizawnna tling a nihzia hriaiin industry-ah a puang tawh a, nasa taka tihhmasawn tum mek a ni,” a ti a, zirlai kalkhawmte chu mihring kan nih dan tur ang min nihtir lotu ruihhlo leh zuk leh hmuam laka fihlim turin a chah bawk.
MZP president Lalnunmawia Pautu pawhin kharna hunah thu sawiin, “Mizo zirlaite hi hnamah kan chiang tur a ni a, hnamdang nupui pasal nei lo turin ka ngen nawn che u a ni. Kan ram leh hnam a him zel theihna’n Mizo hmeichhiate’n hnamdang fa min hrinsak lul suh u,” tiin kalkhawm zirlaite a fuih a, Mizo mipate pawh nupui fanau chawm zo tura tan la thar turin a fuih.