Mizoram University-a finance officer lak tum danah dan bawhchhiaa dan thlawh kan tumna a awm ni ngeiin a lang a. Hemi chungchang hi MZU Alumni Association leh MZU Students’ Council lam beng pawh a thleng tawh nia hriat a ni.
The Aizawl Post-in thu a dawn dan leh document a neih atangin, MZU thuneitu lam chuan finance officer (FO) thar lakna turah registrar kaihhruaiin Screening Committee an din a, member secretary atan Prof Elangbam Nixon Singh, Management department ami ruat a ni. FO hna diltu an awm nual a, interview hmachawn turin mi pali koh an ni a, MZU-a thawk mek mi pathum leh Nagaland University-a FO ni lai Naga mi a tel bawk.
MZU statute section 4(7), 4(8) (b) & (d) ang chuan Executive Council (EC) thutkhawm koh leh EC rorelna thu hriattir chu registrar tih tur a nih laiin, tuna FO lak tura Screening Committee dina member secretary Prof. Elangbam Nixon Singh hian a ti ta daih a. Registrar tih tur zawng zawng member secretary kutah dah a ni vek tih sawi a ni.
MZU vice chancellor chuan registrar mawhphurhna tur a kuta a dah loh chhan a sawiah chuan, FO hna diltu zingah a hnuaia officer a tel ve vang niin a sawi.
Hetih lai hian Screening Committee member secretary-a ruat hi hna diltu zing ami Nagaland University-a FO ni lai nen hian inkungkaih theihna an nei lawi si a, amah hi Nagaland University-ah Finance Committee member ni lai a ni.
Hetiang karah hian kumin July 14-a MZU Executive Council meeting vawi 68-na neih takah Mizoram University Non-Teaching Staff Employees Association (MUNTSA) chuan, finance officer lak danah hian thil dik lo awm theia ngaiin, Selection Committee thutlukna chu thiah leh nise, a tharin FO lakna ruahman leh nise’ tiin vice chancellor hnenah ngenna an theh lut a. Hei vang hian EC hian thutlukna siam loin ‘Selection Committtee thutlukna chu Ministry of Education-ah visitor ngaihtuah turin dah nise’ tiin dah a ni.
EC member a duh apiangin ‘dissent note’ ziah nise an ti bawk a. Sawrar laipui Ministry of Education-ah hian Selection Committee thutlukna, MUNTSA thu thehluh, dissent note leh EC minute thehluh tura tih a nih laiin, Selection Committee thurel (minute) hi thawn a ni ve lo tih thudawnna chuan a sawi.
Hetianga thu an nghah mek lai hian kumin September 10 khan EC thutkhawm koh leh thut a ni a. Ministry of Education thu ang chuan, ‘EC thutkhawm ko tur hian, hriattirna chhuah atanga ni 15 (kar hnih) hnuah thut chauh tur’ tih a nih laiin, ni 15 hmain EC meeting hi neih a ni sawi a ni bawk.
Hemi kaihhnawih hrang hrangah hian MZU Act 2000, statute, MZU/ UGC Cadre Recruitment Rule leh ministry thupek hrang hrang bawhchhiatna leh zah lohna a awm nual tih sawi a ni a. FO lak dan tih that leh ngei duh an awm a, tunah hian boruak a inmung chho mek niin thu dawn a ni.
MZU-a finance officer lak tum danah dan bawhchhiatna awm thei
