MZU-in teacher education programme kalpui dawn

Mizoram University chu Integrated Teacher Education Programme kalpui thei tura thlan a ni a, Mizorama zirna in zinga thlan hmasak ber a ni.
MZU Department of Education head Prof. Lokanath Mishra sawi danin, vice chancellor Prof. Dibakar Chandra Deka kaihhruaina tha tak hnuaiah MZU chu Mizorama zirna in zinga Integrated Teacher Education Programme (ITEP) kalpui thei tura thlan hmasa ber a ni a. NCTE (National Council for Teacher Education) New Delhi-in ITEP programme thar pathum – BA B.Ed (secondary), B.Sc. B.Ed (secondary) leh B.Com. B.Ed (Secondary) kalpui turin a lo thlang a, hei hi university tan hmasawnna tilangtu a ni tih a sawi.
State chhung leh pawn atanga zirlai lokal, senior secondary school pass chhuak tam takte tan zirna sang zawk an zir zawm thei tur chu lawmawm a tih thu Prof. Lokanath Mishra hian a sawi a. National Education Policy 2020-a ITEP chu zirlaite zirtir dan tura zirtirtute inbuatsaih nana a lo ruahman lawk tawh programme a ni, tiin, “Zirtirtu hna dil tumte tan chuan teacher education programme hi chhawr tangkai chi tak a ni ang,” a ti.