Daily Newspaper

MZU Southern Campus ram tur tihfel hnuah DPR thehlut

18

Lungleia Mizoram University Southern Campus dinna tur ram tihfel a nih hnuah Mizoram sawrkar chuan a hmunhma leh ruhrel dinna tur detailed project report, cheng nuai sing thum senna tur chu sawrkar laipuiah a thehlut.

Lunglei Pukpui rama MZU Southern Campus hmun atan Pukpui Village Council-in ram a pek chu Land Revenue & Settlement department-in land lease a siamfel hnu ah Lunglei North bialtu MLA, Higher Education Board vice chairman ni bawk Dr Vanlaltanpuia chuan July 29 khan Mizoram University hotute hnenah land lease provisional certificate hi a hlan a ni.

Hemi chungchang thuthar thehdarhtuten an zawhchiannaah MLA Dr Vanlaltanpuia chuan, MZU Southern Campus dinna tur hi Revenue department-in an tihfel hnu ah acres 344.58 a zau a ni a, a hmun – Mausep ram hi a vaia university campus atana hman theih tur khawpa ram tha leh rem a ni tih a sawi. Hemi tihfelna tura Pukpui VC-in ram an pe te, Revenue department-in rang taka an tehfel leh, Higher & Technical Education department-in bawhzui ngaite rang taka an bawhzui avangin lawmawm a tih thu a sawi.

Ram tihfel a nih takah hian Mizoram H&TE department chuan 2021 July 22 khan sawrkar laipuia Ministry of Human Resources Development hnenah DPR cheng nuai sing thum hu ruahman chu a thehlut a. Chief Minister Office-in DO letter thawn tura a buatsaih mek bakah Mizoram University vice chancellor pawhin a tul anga a theihna zawna bawhzui ve a tum thu te, tunah hian Ministry of Finance-ah a inchiah meka an rin thu te a sawi.

MZU Southern Campus neihna tur hian Lungleia pawl hrang hrang chuan kum 2007 vel atang khan hma la in, sawrkar laipuiah te pawh dilna an lo thehlut tawh thin a; a hlawhtlin theih mai loh hnu ah 2020 January 17 khan Ministry of HRD chuan Mizoram H&TE minister Dr R Lalthangliana hnenah a thuphungin a pawmpuina an pe ta a, he thil a hlawhtling ta hi, Mizoram mai bakah a bikin chhimbial mipui tan thil hlu tak a ni tih Dr Vanlaltanpuia hian a sawi.

University chuan thiamna a pek mai bakah state economy-ah service sector ah a thawhhlawk hle tih sawiin, MZU pawh hian a thawhhlawk hle tawh laiin, Sourthern Campus a awm belh leh phei chuan state economy a do puina tur hi a san belh dawn tih a sawi a ni.

Lunglei Kawmzawl rama Engineering College hmun tur a ruhrel peihfel vek tawh, a taka la kalpui theih loh chu, state sawrkar thuneitute ruahmanna ang chuan, MZU Southern Campus hmunhma leh ruhrel peihfel a nih hma chuan, zirna tanna atan hman tum a ni tih Higher Education Board vice chairman hian a sawi. “MZU Southern Campus hmunhma leh ruhrel hi kum hnih khat leka din zawh mai theih a nih dawn loh avangin lo hman rih a tul a rinawm,” a ti.

Zawhna chhangin, Engineering College hi RUSA (Rashtriya Uchchattar Shiksha Abhiyan) hnuaiah cheng vaibelchhe 26 senga din niin, he sum hi campus ruhrel dinna atan chauha tih a ni a. A panna kawng, km. 2.7 a thui chu la siamthat loh a nih bakah tui leh eng pekna tur tihfel ala ni lo bawk a; heng zawng zawng tih zawhna atan hian cheng vaibelchhe 11 vel DPR siam niin, state sawrkar sum a ziaawm deuh hunah bawhzui tur a ni tih MLA Dr Vanlaltanpuia hian a sawi.

MZU Southern Campus-ah hian eng zirna te nge kalpui tum a nih, tih chu tunah rih chuan sawilawk la har deuh mah se, MZU Tanhril-a zirna/department la awm lo, kalpui atana tha si te ruahman a nih a rin thu te, Engineering College hmunhma hman rih a nih dawn avangin engineering lam zirna te pawh dah tel a tul a rin thu te a sawi bawk.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy