In ngaihzawn chhung chu a rei emaw rei lo emaw, ni nga emaw, kar nga emaw, thla nga emaw, kum nga emaw pawh ni se inthen hrim hrim hi a awlsam lo a, a nuam ngai lo, an thena te nih zawk phei chuan a hrehawm lehzual. Min then chuan min hnawl tihna ang a ni a, hnawl nih chu khawiah mah a nuam ngai lo. A thentu zawk nih chuan a zia tak a la awm a, an thena te zawk nih chuan na tak a ni thin.
Hetiang hunah hian rilruah thil chi hrang hrang a rawn lang zut zut thin ang ‘Ka tidik em aw?’ ‘Ka thutlukna hi a tha ang em?’ ‘Lo tap vak ta se engtin nge niang?’ tih te leh thil dang tam tak hi a thentu te rilruah pawh a lo lang ve nghal thin a, mahse, chutiang mai mai chu i thutlukna siam tur indal tir duh chuang suh. Inthen chu harsa hle angin lang mah se an rilru hliam lutuk lo leh na lutuk lo a inthen theih dan a awm niin relationship lama mithiam ten an sawi a, kan rawn tarlang e.
1. Inthen duhna chhan chi hrang hrang a awm thei a, ngaihdan a inan hleihtheih loh vang a, hmathlir inpersan lutuk thin vang te, induhna a lo chuai tak vang te leh, a chhan dang tam tak a awm thei ang. I ngaihzawng/ kawppui chu then i duh a nih chuan inthen i duhna chhan chiang takin hrilh ang che. A chhan hre hrilh si lo a inthen ringawt te hian natna a tizual thei a ni. Inthen chu na hle mah se a chhan felfai taka i hrilh chuan ani pawhin pawmdan a thiam thei deuh zawk ang.
2. I ngaihzawng/kawppui i then tur laka i rilru puthmang chu nangmah ngei pawhin hriatthiam loh chang i nei a, i tidik nge dik lo tiin i rilru pawh a insual buai fo thin ang. Mahse, hetianga i rilru a buai chang apiangin a tira i rilru siamfel tirtu che kha hre reng ang che, chuti chuan nang pawhin in inthenna chu i pawm thiam thei zawk ang.
3. Inthen chu a tu zawk zawk tan pawh a harsa thei a, chutihrualin thenna thu i sawiin a dawnsawn thiam dan tur i ngaihtuah a pawimawh a, i duhna chhan te a hriatthiam theih ngei tura sawi a pawimawh a, chutiang bawkin i sawi chhuah danah pawh a dawngsawngtu chung tlak lutuk leh tham lo lutuk anga lang ni loin, ngilnei leh zahawm taka sawichhuah thiam a tha. Tin, i thil sawi danah chiang la, aniin eng emaw beisei a la neih leh theihna tur siam sak a fuh lo ang. Beisei tur a awm tawh lo a nih chuan tlang taka hrilh nghal tur a ni.
4. I tana ani chu engtiang taka hlu nge a nih tih hi ngaihtuah thin ang che. Inthenna thu sawi dawnah ani chu in hun kaltawhah te i tan eng tianga hlu nge a nih tih te chhut la, an hlut dan a zira hun kan pek thiam te pawh a tha ang. I tana hlu lutuk lem lo, inzawmna pawh nghet lutuk lo in nih chuan minute rei tak a ngai chuang lo a, in-close tak in lo ni tawh a nih chuan sawi liam puat ringawt lo deuh a, mumal deuh taka inhrilh a tha ang.
Na lutuk lo a in\hen dan a awm em!
