NAAC-in MZU a endik hnai
Alumni inkhawrhchhuak mek
National Assessment and Accreditation Council (NAAC) chuan Mizoram University a endik hnai a, hemi kawngah hian MZU Alumni Association chuan theihtawpin an tih theih zawnah tan an la ve mek tih an sawi.
Mizoram University Alumni Association (MIZUAA) president Dr Henry Zodinliana Pachuau sawi danin, university /college that dan endikna, NAAC Peer Team chuan kumin March 4-6 chhung hian MZU an endik dawn a, thawktute leh zirlaite bakah he university atanga chhuak tawh leh Mizoram mipui tha thawh a pawimawh hle dawn tih a sawi.
NAAC accredition hi kum 5 dana neih thin a ni a, zirna in that leh that loh tehna mai bakah hmasawnna atana sum a dawn theih thlenga a hril avangin a pawimawh tih a sawi a. MZU hi NAAC endikna hnuhnung berah ‘A’ grade niin, hniam takah a la awm ngai loa, tunah phei chuan India rama university tha zinga a lan phak hial tawh avangin ‘A’ grade chunglama inhlangkai pha turin inbuatsaih mek a ni tih a sawi.
MIZUAA hruaitute chuan he university atanga zirchhuak hi mi sing chuang an awm tawh a, tunah hian registered member erawh an la tam lo hle a, zirchhuak tawhte alumni member ni turin an insawm tih an sawi a. Tuna NAAC endiknaah pawh hian pawimawhna thuk tak an neih ve dawn avangin inziaklut zel turin an ngen tih an sawi a ni.
Thiamna leh eizawnna petu university tana pek let theih ve an neihte pe let ve turin zirchhuak tawhte an sawm a, MZU website ah leh whatsapp group ‘MZU connect’ atangin alumni member-a inziahluh theih reng a ni tih an sawi a ni.
NAAC-in MZU a endik hnai Alumni inkhawrhchhuak mek
