Paris Olympic-a Spain gold medal beiseina lian pakhat mipa tennis double-ah Rafael Nadal leh Carlos Alcaraz inkawp chuan Inrinni zan khan Argentine sixth seeds Maximo Gonzalez leh Andres Molteni lakah 7-6(4), 6-4 hnehna an chang a, Roland-Garros stadium-ah Olympics men’s doubles second round an lut.
Spaniard-hoin ‘Nadalcaraz’ tia an kohfiam tak superstar pair hian Court Philippe Chatrier-ah inkhel hmuhnawm leh mit la tak an entir a; hliamin tibuai chho ve ta reng mah se kum 38 mi Nadal chu French Open title 14 a lak tawhna mualah hriam takin a la inlan thei a, a backhand pawh a la chhe lo kher mai.
Nadal hi Games zawh ruala chawlh ve tawh a tum leh tum loh inkhelh banah an zawt a, Spaniard chuan, “Tum lo e, chutiang ka la sawi ngai lo. Eng hun pawh hi ka la hlimpui a, ka tawnhriat tha ber ber vek an la ni kal zel,” tiin a chhang.
Kumina grand slam title pahnih French Open leh Wimbledon title la fel der tawh Alcaraz chuan a naupan lai atanga a hero ni tawh Nadal nena an tangdun thei ropui a tih thu a a sawi.
Nadal leh Alcaraz inkawp chak nghal
