Daily Newspaper

Naga khua Thanamir in Apple tharchhuak

16

Kum 1980 chho vela Nagaland ram buaina nasat vanglaiin Kashmir atangin Assam Rifles sipai ten Nagaland-a Thanamir khuaah Kashmir Apple an keng lut a.

Thanamir apple hi Gurkha sipai leh village uard J. Yongphukhiung te ‘inthiah thatna’ rah niin kum sawm li a ral meuh chuan Thanamir apple chu local students’s union te an zuar chhuak ta.

Thanamir khua hi Naga hnam Yimchungru te khua Myanmar ramri bula Kiphire district a awm a ni a. Nagaland tlang sang ber 2,840 metre a sang Saramati lawn duh te tana an tawpna thin khua a ni a.

State sorkar chuan kum 2013 khan vegetable village ah puangin chumi hnu kum nga velah kawngpui hmanga chhun pawp a ni chauh a.

Mahse, Kashmiri apple an chin chu Thanamir Students’ Union (TSU) tena thehlar nana officials, horticulture expert leh adventurous visitors te hip tura festival an buatsaih hnuah a larchhuak ta chauh a ni.

“Apple Festival a zawna kum riat kan neih hnuah kuminah Covid-19 khuahkhirhna avangin kan nei thei lo va. Hei vang hian kan apple te hi khawpui hnai bera zawrh theih turin hma kan la ta a ni,” tiin TSU Vice-president N. Lemchimong chuan a sawi.

Mamawhna a sang
State capital Kohima, Thanamir atanga 300 km a hla leh darkar riat zel tlan ngaiah leh Nagaland sumdawnna hmunpui ber Dimapur-ah August-September ah an zawrh a ngai ta a ni. Apple te hi carton khat 7 kg zel Rs 1,000 in an hralh a, an inchuh zo nghal.

Kohima-a inbun Vatsu Meru, Minister hlui ni bawk chuan Thanamir apple chu inchuhzawh zel niin hma taka neih theih pawh a ni lo, a ti a. Khawpuia cheng tena an lei theih nan TSU te ang ten hma an lak loh chuan tihngaihna awm lo a ti a.

“He apple hi a lian a, a thlumin tui a ngah bawk” tiin Kohima a cheng Adeno Koutsu chuan a sawi. Thanamir apple hring chu thlum thur deuh niin a sen erawh tui ngah tak a ni thung.

Thanamir khaw hotu Rethrongki chuan loneitu 150 changin kuminah apple an thar tiin a sawi a. TSU te hmalakna tel lo chuan heng apple te hi hralh ngaihna awm lo a nih thu a sawi bawk a.

“Apple zawrh project kan neih hi kum thum atan a ni a. Apple tharchhuak khawdang zirlaite nen pawh apple bakah thei dang te hralh tura hmalakna kan nei,” tiin Lemchimong chuan a sawi bawk.

Apple te hi hmun sang tak Thanamir khua bakah a chhehvela khaw dang parukah a tha duh em em nia sawi niin heng hmunah te hian kiwis, serthlum, lakhuihthei, balhla leh theihai te pawh an chin thu a sawi bawk.

Kiphie district horticulture officer Elias Lotha chuan khaw pasarih tena kum khata apple an tharchhuah chu 25 metric tonnes niin ram 30 hectares velah an ching a ti a. “Sum lama puihna kan neih bakah chin dan leh a upa tawh te an rah that theih nan training kan pe,” tiin a sawi bawk a.

Mahse, Thanamir a apple chingtu hmasa ber Yongphukhiang chuan training a mamawh ve lo thung. Apple kung atangin a zar lak pen dan zirin chu chu a khaw mite hnenah an chin ve turin a sem darh thiam thung.

Yongphukhiang a apple phun hian tun thlengin rah a la chhuah reng bawk.

(THE AIZAWL POST – Ramchhung)

The Aizawk Post

Full>> ePaper Subscribe

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy