Nagaland-a Dzukou Valley kangin Manipur kai tawh

Nagaland-a Dzukou Valley kangin Manipur kai tawh
Nagaland-a Dzukou Valley ram ngaw chhah tha tak chu a kang mek a, a chhunga awm thing leh ramsate tan a hlauhawm tan mek a. Manipur ram chin pawh a man kai tawh bawk.
Ram kang hi Thawhtanni atanga intan kha a ni a, Thawhlehni khan thuneitute hnenah pawh hriattir a ni tawh.
Kangmei chhuah chhan leh khawi lai atang tak nge a intan tih chu hriat a ni lo niin news agency PTI chuan a tar lang a. Manipur-a tlang sang ber, Mount Esii pawh a man kai tan tawh a ni.
Kangmei chhuak avanga Dzukou Valley-a tangkhang mek hawi khawthawng mi 30 vel chu Nilaini khan chhanchhuah an ni a. Heng mite hi phaikuama a sang lai atangin him taka lak chhuah an ni a, district thuneitute leh Southern Angami Youth Organisation (SAYO) chuan kang an thelh rualin a kang zel tur vengin an bei mek bawk niin thuneituten an sawi.
Dzukou Valley-ah hian hawi khawthawnga lengvakte luhka pahnih, Jakhama leh Viswema chu kangmei chhuak mek avang hian khar rih a ni tih thuneituten an sawi.
December thla mai khan Khonoma Dzukou Valley-ah ram nasa takin a lo kang tawh a, hemi tum hian kang thelhtu pawl hrang hrangin a thelh hna an thawk a ni.
Deputy Commissioner B Henok Buchem-a chuan hmalak dan tur ngaihtuahtu tur leh chhanchhuah hna thawka hma lak dan tur ngaihtuahtu committee a din tawh a. “A kan belh zel lohna tura venna tura mamawh ang zawng zawng chu a awm vek,” a ti a. Mihring thawk tur mamawh belh a ni a, chu pawh chu tirh nghal an ni dawn tih a sawi.
DDMA thuneitu sang chuan Nilaini chawhnu khan emergency meeting neih tawh niin hmalak chhunzawm zel dan tur an sawiho tih a sawi bawk.
SAYO chuan mi thenkhatin thlalak leh video an thehdarh atangin Thawhtanni chawhnu khan ram kang a awm tih hi an hriat tan thu an sawi a. An pawl hian tangkhangte chhanchhuah hna chu ngai pawimawh berin mi dang pawh an buai zui lohna turin hma an la nghal tih an president, Zasitsolie Beio chuan a sawi.
Kangmei chhuah chhan hi chiang taka hriat a ni lo va, tual chhung mi thenkhat chuan mi tuten emaw an hal avanga chhuak a nih an ring.
“A tlangpuiin Dzukou Valley-a kang hi a bul thut lam atanga intan niin hawi khawthawnga lengvakten mei an chhem atangin a ni thin a. Hetiangah hi chuan a mual awihah hian a inman kai chho zel thin,” tiin tual chhung mi pakhat chuan India Today a hrilh.
Dzukou Valley bula chengte hi a tlangpuiin Angami Naga an ni a, anni hian Manipur-a cheng, Mao Naga hal niin an ring.