Daily Newspaper

Nagorno-Karabakh inchuhnaah Russia-in hma la

24

Russia chuan Nagorno-Karabakh inchuha Azerbaijan leh Armenia intihbuaina kal mek tihtawp a nih theih nan inbiakna neihpuiah a sawm.

Foreign Minister Sergei Lavrov chuan sorkar pahnih te chu ko ve vein indolai vaupung ang maia boruak siam titawp turin a ngen bawk a.

Pathianni atanga buaina chhuakah mi 100 chuangin nunna an chan tawh a, Nagorno-Karabakh a buaina chhuakah kum rei tak chhunga nunna chan tam ber tum a ni.

Nagorna-Karabakh hi official chuan Azerbaijan ram niin mahse, ethnic Armenian te chenna leh awp a ni thung.

Soviet Republic ram hlui Armenia leh Azerbaijan te hian kum 1988-1994 khan Nagorno-Karabakh inchuhin an indo tawh bawk a. Tun boruak kal mekah khawvel ram dangte an hnuklut ngei dawna ngaih a ni bawk.

Nilaini khan Lavrov office chuan Armenia leh Azerbaijan foreign minster te chu a koh ve ve thu sawiin Russia chuan inbiakna thlen a duh thu a hrilh a ni.

Russian President Vladimir Putin chuan French President Emmanuel Macron nena telephone a inbiain an sawi dun thu a sawi bawk a. Ram pahnih hruaitute chuan khawvel ram hruaitu dangte chu inkahhaina a awm nghal theih nana chet la turin an duhthu an sawi dun a ni.

Russia hi Armenia nena military alliance nei niin sipai hmunpui a neihna a ni bawk a. Chutihrual chiah chuan Azerbaijan sorkar nena inzawmna nei tha tak a ni bawk.

Armenia chuan independent ram anga inchhal Nagorno-Karabakh chu a thlawp a, mahse, official takin a pawm ngai lo thung.

Tuna buaina hi eng chiahin nge tipunlun hriat a ni lo va. Nilaini khan Azerbaijan President Ilham Aliyev chuan Aremnian sipai tena he region an chhuahsan hma chuan beih an tum thu a sawi thung a.

“Thu dehkilh pakhat chauh kan nei : Armenian armed forces te hian thudehkilh nei hauh lovin kan ram hi an chhuahsan nghal tur a ni,” tiin a sawi.

Azerbaijan chuan video tichhuakin hmelma tank pahnih an tihchhiat lai leh Armenian sipaitena Tonashen khua an tlanchiatsan lai an tichhuak a ni.

Armenian media-te chuan Azerbaijan indo thlawhna tena Martakert khua an beihna avangin civilian pathumin nunna an chan thu an sawi a. State news agency Armenpress chuan civilian pasarih leh sipai 80 in nunna an chan tawh thu a sawi bawk.

Armenian defence ministry te cuan Armenian SU-25 jet, Turkish F-16 in Thawhlehnia a kahhtlak thlalak an tichhuak bawk a. Turkey hi Azerbaijan thlawp rumrut a ni.

Fighter pakhat chuan BBC Arabic hnenah kar kalta khan northern Syria ah lak a nih thu sawiin thlawhna hmangin Turkey paltlangin indona hmunah tirhluh a nih thu a sawi a. Mahse, hei hi Turkish president Recep Tayyip Erdogan adviser Ilnur Cevik chuan ‘behchhan tur nei lo’ tiin a hnawl thung.

Ram pahnih buaina hian Nato ram pahnih France leh Turkey inkarah boruak a siam hle a. France hi Armenian mi tam tak chenna niin Turkey chuan an Turkic pui ram Azerbaijan a thlawp sa bawk.

Nilaini khan Turkish Foreign Minister Mevlut Cavusoglu chuan France chu Armenian tena Azerbaijan ram an awp thlawpah a puh a.

Hei hi France President Macron chuan chhang let nghalin Turkey chu ‘indo lai thuchhuah’ ang siamah puhin ‘hei hian Azerbaijan in Nagorno-Karabakh chungchanga timna a neih te a tibo vek a ni’ tia sawiin, “chu chu kan pawm dawn lo” a ti bawk.

Macron leh Putin tena inbiakna an neih hnuah Kremlin chuan thuchhuah siamin hmalak zel dan tur chu Minsk Group of the Organization for Security and Co-operation in Europe (OSCE) te kutah dah ni se an ti a ni.

Minsk Group hi kum 1992 khan din niin France, Russia leh US ten an kaihhruai a ni.

(THE AIZAWL POST – Rampawn)

The Aizawk Post

Full>> ePaper Subscribe

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy