Nakkum World Cup-ah Messi kan hmu dawn em?
Thla thara Kerala a tlawh tur sawnhla
Kum 20 dawn a nghah hnua international hlawhtlinna lian ber sualchhuak ve ta hram Lionel Messi chuan nakkum World Cup hi khelh leh theih ngei a inbeisei thu leh 2022 title an kawl lai humhim a duh thu sawi chungin eng tiat chiah mawhphurhna nge a lak dawn tih hre turin a taksa dinhmun la zirchian rih a ngaih tur thu a tarlang tel.
Argentina captain hian ram tana match 195 a khelh tawh atanga record siamin goal 114 a thun tling tawh a, Argentina tana goal khung hnem ber niin, 2026 World Cup-ah hian kan hmu leh a nih chuan he tournament-a tum ruk ngawt a inlanna tur a ni tawh ang!
Argentine great hian tunhnai mai khan Major League Soccer club Inter Miami nen inremna thar ziakin, kum 2028 thleng a club ngaiah a cham dawn a, nakkum June thlaa kum 39 tling chho ve tawh tur a ni chungin tun dinhmunah chawlh lam a la awn lo!
Tunhnaia NBC News-in an kawmnaah eight-time Ballon d’Or winner hian nakkuma United States, Mexico leh Canada-te inthlentawm tur tournament-a a hawi lam tur sawiin, an trophy kawl lai humhim tura Argentina thuam inbel leh ngei a duh thu sawi mah se a taksa dinhmun a ngaihchan phawt tur thu a sawi.
Thawhtannia a interview an tarchhuahah Argentina captain chuan, “World Cup-a han tel leh theih chu thil namen lo tak a ni leh dawn a, a chak pawh ka chak ngang mai a; ram tan ka inlan leh thei a nih chuan tha taka khelh leh ka team tanpui tura pawimawhna neih pawh ka duh ngei dawn a, mahse, nakkuma Inter Miami lama pre-season ka tan hunah nitina ka dinhmun ka han zirchiang ang a, World Cup khel tura 100% ngeia ka inhuam a nih a, ka la tangkai thei dawna ka inhmu a nih chuan thutlukna ka siam chauh ang,” a ti!
‘A tar at hma lal tum’ han tihte nen chuan a dan a dang deuh!
Sawizawmin, “World Cup kha a nih miau avangin inlan leh chu ka chak kher mai a; a hnuhnungbera champion team kha kan ni lehnghal a, title kawl lai humhim tuma hmabak phurawm tak nei chunga chhuah phei chu a chakawm zual a; ram aiawhtu nih hrim hrim hi thil thlakhlelhawm a ni,” a ti.
Messi hian kum 20 chuang professional career kalpui tawhin, kum 2004 khan Barcelona tan rawlthar kum 17 mi lek ni chungin bul a tan a; Nou Camp-a a career pumpui a hman zawh mai rinna a pian hman hial hnuah mittui nen Paris St Germain a pan a, tah chuan French-ho it ber Champions League trophy a lakpui zo lo a; kum 2023-ah tun thlenga a vawn mek Inter Miami hi a pan leh ta a ni.
North America khawmualpuia fooball a arh chhuah tak tak theih loh laiin Messi an senglut hian American league pawh a chawisang dawrh a; a eizawnna ram US chu nakkum World Cup thlengtu pui ber an nih dawn bawk avangin a hranpaa va mikhual chiam ngai lo tur Messi tan Fifa tournament liana inlan leh hi a chawh hle a ni!
World Cup-ah ber champion thei lawk lo mah se Messi hian club leh mimala lawmman leh trophy awm thei zawng zawng chu a hui kim a ni ber tawh a; international kawtkaiah pawh 2021 Copa America-ah a ram champion-pui tawhin, Qatar rama World Cup hnuhnungber an nghah tum khan final penalty shoot out-ah 4-2-a France hnehin Argentina tan football trophy lian ber a lakpui a, tunah world title vawi hnih la thei mi tlemte zinga tel turin hun thain a hmuak zui leh mek a ni!
Messi hi Olympic gold medalist ni tawh bawkin, Copa America bikah tum hnih a ram a champion-pui tawh.
Club level bikah chuan Barcelona tan kum 2004-21 chhung a khel a, Catalan atanga a insuanchhuak ta mai khan khawvel mak tih pawh a hlawh hle a nih kha.
Kerala zin tur sawnhla
Lionel Messi hian kumin December thlaah a team-te hruaiin India a tlawh dawn a, chu chu mimala India tlawh tur niin, he individual tour hi a hmingah G.O.A.T India Tour 2025’ tih a ni dawn a; hei lo pawh hi kuminah vek Argentina tana friendly match khela India tlawh tur a nih lain Kerala lama khelh tur Argentina friendly match hi sawnhlat a nih thu kar liamta Inrinni khan puanzar a ni.
Ruahman lawk ang chuan thla thar mai November ni 17 khian Kochi khawpuia Jawaharlal Nehru International Stadium-ah Argentina leh Australian men’s football team-te chu friendly match khel tur an nih laiin ‘postpone’ a ni a, a hun leh ni erawh tihfel a la ni lo.
Argentina Football Association (AFA) chuan September thla khan Olympics.com inkaihhruaina angin friendly match khelhna tur khelmual leh hmunhma hi an endik fel tawh a, mahse, Indian fans lamin Messi inkhel lai an thlir hun a hla leh hlek dawn!
Kerala tlawh programme hi November thla FIFA International Window laia Argentina friendly match khelh hun pangngai peng pakhat niin, hetia a hun an sawnhlat chhan hi sponsor-te sawi danin, FIFA permission an hmuh tlai vang a ni.
Heti a nih takah chuan thla tharah an khel hman dawn lo a, international window inhawn leh hmasakber atan an dah ta a, tarlan tak angin, a hun leh ni erawh an la dah hman rih lo.
Argentina team ruala Messi lo zin hnuhnunber chu kum 2011 daih tawh kha niin, Kolkata khawpuia khelmual ropui Salt Lake Stadium-ah Argentina leh Venezuela-te’n friendly match an khel a nih kha.
Tarlan tawh thin angin, Messi hian individual tour hmangin kumin hian India a rawn tlawh dawn a, he event hi ‘GOAT India Tour 2025’ tih niin, Kolkata khawpuia Eden Gardens-ah December ni 13 khian tour bul an tan ang a, Mumbai (Wankhede Stadium on December 14) leh Delhi (Arun Jaitley Stadium)-ah hun an hmang leh ang.
Nakkum World Cup-ah Messi kan hmu dawn em? Thla thara Kerala a tlawh tur sawnhla
