Karliamta Zirtawpni khan Indian wrestler Vinesh Phogat-i’n Cuba mi Yusneylis Guzman Lopez nena joint-silver medal dawn a ngenna chungchanga ‘hearing’ chu zawh fel tawh niin, sports thuchhe remna sang ber Court of Arbitration for Sport (CAS) chuan he mi chungchanga thuremna chu India huna August ni 13, Thawhlehni zan dar 9:30-a puan a nih tur thu an tarlang.
Paris Olympic Games 2024 zawh fel tak hmeichhe wrestling kg 50 huang semi-final bout pakhat zawkah Phogat hian Cuban Lopez lakah hnehna chang mah se he bout atana a rihzawng endik nawnnaah karhmasa Nilaini khan gram 100 lekin a khelhna category-in a phut zat rihna a lo pel a, semi-final paltlang mah se women’s 50kg Freestyle wrestling final khel thei lo turin inelna kal lai atanga paihchhuah (disqualify) a ni a, a lo berah pawh India silver medal dawn tur a kiam ta a ni.
Wrestling Federation of India hriatpuinain Phogat hian a chungchang ngaihtuah dilna CAS-ah thehlutin, final khel thei lo mah se final-a chak zo ta lo Cuban wrestler nen chuan silver medal tal dawn duntir ni se tiin a thlen a; Court of Arbitration for Sport hian Paris 2024 chhunga thubuai ngaihtuah turin ad-hoc division chu Paris-ah a hung a, chu chuang Indian wrestler chungchang hi ngaihtuah mah se Games zawh hmain thutlukna a puang hman ta lo a, Thawhlehni zana thutlukna puan a nih tur thu hriat tur a awm zui ta a ni.
Kum 29-a upa chungchanga thuremna hi a tirah chuan Inrinni zana puan hman tura tih ni mah se Games hmawrbawk hnaih lam, ngaihtuah tur neuh neuh tam lai a nih avangin Pathiannia hriat hman tura tih a ni a, chu pawh puitlin zo loin Thawhlehnia thutlukna puan a nih tur thu nemngheh a ni leh ta zawk a ni tiin Indian Olympic Association thuchhuah chuan a tarlang.
IOA chuan CAS ad-hoc division lamin Sole Arbitrator Hon. Dr Annabelle Bennett chinfel tura dah Vinesh Phogat vs. United World Wrestling & the International Olympic Committee chungchanga thutlukna tarchhuah hun tur a sawn leh thin avangin thupha chawina a tichhuak hial a ni.
Paris Games hi nizan khan track and field event zawng zawng nghahna Stade de France-ah closing ceremony ropui tak nena khar niin, India chuan gold medal tel loin medal paruk nen Games a thlahliam a; silver pakhat leh bronze panga hawnin, bronze pahnih chu pistol shooter Manu Bhaker-i hlawhchhuah niin, India silver medal lawm tur neihchhun hi men’s javelin throw defending champion Neeraj Chopra thawhchhuah a ni thung.
CAS ad-hoc division hian Vinesh ngenna tihlawhtlingin Indian wrestler hian silver medal a dawng leh hnuhnawh a nih chuan medal tally-a India dinhmun hi a danglam leh hlek thei ang.
Naktukah Phogat chungchanga CAS thutlukna hriat theih dawn
