Player langsar tak tak ten Covid 19 vanga US Open khelh an tum loh sup sup laia khelh tuma inbuatsaih Naomi Osaka chu a inhliam a, a inlan leh thei dawn lo. Osaka a inhliam vang hian Victoria Azarenka chu Western & Southern Open champion thar a ni.
2018 US Open champion Osaka hian zirtawpni khan Elise Mertens a hmachhawn a, 6-2 7-6 (7-5) a hneh hramin final a inhlangkai. Final-ah hian World No. 1 hlui tho Azarenka hmachhawn tur a ni a, mahse, hliam vanga inlan theih tak loh vangin 2016 hnu lama a vawikhat nan Azarenka hian trophy a hlawhchhuak ve ta a ni.
Kum danga Grand Slam khelh hnuhnung ber ni thin US Open chu vawiin hian khelh tan a ni dawn a, champion hlui Osaka hi Misaki Doi hmachhawn nghal tur a ni ang a, hliam vangin a inlan thei dawn ta lo thung a ni e. Oska a inhliam leh tak vang hian US Open 2020-ah hian hmeichhe player langsar an inlan lo thup dawn a. Hmeichhe inelna bik hian kum dang boruak a pha lo hle ngei dawn a ni.
Vawiin a khelh tan tur US Open-ah hian mipa lamah pawh champion lai Rafael Nadal a inlan dawn lova, Grand Slam-a champion ngun ber Roger Federer a inlan thei dawn lo bawk. Mipa World No. 1 Novak Djokovic erawh chuan hripui karah pawh US Open-a inlan chu a mamawh phurhna nia a ngaih thu a sawi a, inlan ngei a tum. ATP President leh Player council President a nih vangin hun harsa karah pawh inelna lian hmachhawn tih a tih ngei turah a ngai a, first round-ah Kyle Edmund a hmachhawn ang. Western & Southern Open champion thar Djokovc hian ATP President a nihna chu nimin khan a chawlhsan thu a puang thung.
Champion lai Nadal a inlan dawn loh vangin Austrialian Open finalist Dominic Thiem chu seed no 2 a ni dawn a, an chak dun zel a nih chuan Australian Open final-a a hneh loh Novak Djokovic nen final-ah an inhmachhawn leh thei dawn a, Thiem hian Jaume Munar hmachhawnin US Open bul a tan ang.
(THE AIZAWL POST – Infiamna)
Full>> ePaper Subscribe
