National Commission for ST hotuten Siaha an tlawh

National Commission for ST hotuten Siaha an tlawh
National Commission for Scheduled Tribes (NCST) chairman Antar Singh Arya leh member dangte chuan Thawhlehni chawhnu khan Siaha an thleng a, state sawrkar leh District Council hotuten an lo dawngsawng.
NCST chairman chuan Commission hi tribal-te tana thawk tura din a nih angin, scheduled tribe-te hamthatna turin kawng hrang hrangin hna an thawk thin tih a sawi a. India Prime minister leh President pawhin kawng hrang hranga tribal-te hmasawnna an ngaipawimawh tih a sawi.
Hnam ziarang leh tawng humhalh a nih theihnan Autonomous District Council an hmuh theihna tura theihtawpa lo beitu hruaitu hmasate zarah ADC an nei thei chu malsawmna a ni, tiin, hnam anga a dinchhuah a, hma a sawn zual zel theihnan dikna leh rinawmna nen ram leh hnam tan theihtawp chhuah zel turin a chah.
NCST hian Siaha-a pawl hrang hrang – ECM Assembly MTP Hqrs, MCHP Hqrs, MSO Hqrs, MHP Hqrs hruaitute kawmin an mamawh leh duh an thlen a. MADC leh LADC hotute nen inkawm chhunzawmin, harsatna hrang hrang a hnena an thlente sutkian a nih theihnan theihtawp chhuahpui a tum thu a hrilh.
NCST hi an chairman bakah member dang – Dr Asha Lakra, Jatothu Hussain leh Nirupam Chakma te an ni.