National Games-a ropui ber Services leh bawk!
2025 National Games of India chu nimin khan khar fel a ni ta a, kum 2007, 2011, 2015 leh 2022-a team champion lo ni zawn tawh Services Sports Control Board (SSCB) bawk an chetha leh ber a, overall title an lakna kawngah medal 121 la tlingin, chu’ng zinga 68 chu gold a ni a, silver 26 leh bronze 27 an hui tling.
Ningani kha intihsiak tawp ni niin, Services an chetha tawk lo chungin a ni hnuhnungberah pawh medal pakua chu an la hui pha cheu a, chu’ng zinga pathum chu gold a ni nghe nghe.
38th National Games-ah hian Mizoram chuan gold medal pahnih leh bronze pakhat hawnin, medal tally-ah 28-na an luah a, an hnuaiah state lian Bihar, Meghalaya, Puducherry, Nagaland leh Sikkim an la awm ve lehchhawng!
Uttarakhand 2025 an tih bawkah khan Services chuan Indian sports an thunun hnehzia an pholang nawn leh a, Games hnuhnung vawirukah a vawingana atan champion nihna an chang a, an hnuai chiaha pahnihna luahtu Maharashtra (48 gold, 47 silver, 58 bronze = 153) chu medal belhkhawmah an sang zawk a, mahse, gold an lak tlem zawk avangin Services an pha ta lo a ni.
Pathumna Haryana (48 gold, 47 silver, 58 bronze = 153) pawh medal hui tam lamah ngawr ngawrah chuan Services aiin an chungnung zawk an mahse, anni pawh hi gold lak kawnga an hniam zawk avangin pathumnaa an lungawi mai a ngai.
Karnataka (34 gold, 18 silver, 28 bronze) leh Madhya Pradesh (33 gold, 26 silver, 23 bronze)-te chu top five luahtu dangte an ni.
Top 10-ah hian Tamil Nadu (27 gold, 30 silver, 34 bronze), a thlengtu Uttarakhand (24 gold, 35 silver, 43 bronze), West Bengal (16 gold, 13 silver, 18 bronze), Punjab (15 gold, 20 silver, 31 bronze) leh Delhi (15 gold, 18 silver, 29 bronze) an intlarthla ve leh bawk.
Nimin khan 38th National Games of India closing ceremony hi Haldwani khawpuiah nghah niin, Union Home Minister Amit Shah chuan a hmanpui.
Tarlan tawh thin angin, kumin National Games-ah hian sports chi hrang 34-a medal awmte inchuhin state 28 leh Union Territory pariat bakah SSCB atangin infiammi an fuankhawm a; Olympics kalphung anga India rama inelna lianah hian sipai team SSCB khum zawh an har a, National Games champion vawinga ni thei awmchhun niin, Uttarakhand 2025 hma chiah hian Maharashtra chuan an hmakhalh ve zawk a ni.
Tuntum National Games 2025-ah khan India rama top athlete kan neihte zingah Olympic medallist Lovlina Borgohain (boxing) bakah shooter rualkhat – Swapnil Kusale, Sarabjot Singh leh Vijay Kumar-te an inlan.
Athletics inelna bikah Tajinderpal Singh Toor (shot put), Parul Chaudhary (3000m steeplechase), Jyothi Yarraji (100m hurdles, 200m) leh Amoj Jacob (400m)-te chu hming hraw zingah an tel ve bawk.
National Games 2025 medal tally
Pos. State/UT/Team G S B Total
1 Services Sports Control Board 68 26 27 121
2 Maharashtra 54 71 76 201
3 Haryana 48 47 58 153
4 Madhya Pradesh 34 26 22 82
5 Karnataka 34 18 28 80
6 Tamil Nadu 27 30 35 92
7 Uttarakhand 24 35 44 103
8 West Bengal 16 13 18 47
9 Punjab 15 20 31 66
10 Delhi 15 18 29 62
11 Manipur 14 16 25 55
12 Odisha 14 15 17 46
13 Uttar Pradesh 13 20 23 56
14 Kerala 13 17 24 54
15 Rajasthan 9 11 23 43
16 Gujarat 8 10 20 38
17 Jharkhand 7 6 12 25
18 Andhra Pradesh 7 1 6 14
19 Jammu and Kashmir 5 6 13 24
20 Andaman and Nicobar Islands 5 3 2 10
21 Chandigarh 4 6 9 19
22 Himachal Pradesh 4 3 8 15
23 Arunachal Pradesh 4 3 6 13
24 Assam 3 15 16 34
25 Chhattisgarh 3 4 9 16
26 Telangana 3 3 12 18
27 Goa 2 4 4 10
28 Mizoram 2 0 1 3
29 Bihar 1 6 5 12
30 Meghalaya 1 2 2 5
31 Puducherry 0 1 1 2
32 Nagaland 0 0 2 2
33 Sikkim 0 0 2 2