Commerce & Industries department leh Ministry of Textiles hnuaia Weavers’ Service Centre Aizawl chuan Ningani khan National Handloom Day vawi 11-na an hmang.
Hmanpuitu I&PR minister Dr Vanlalthlana chuan, Mizo puan design chu a danglam bik riau avang leh hnamdangte mawi tihzawng a nih avangin, ram pawna thawnchhuah a nih theih chuan a hnam ang leh a tahtute tan hlawkna a ni dawn tih a sawi. Chutihrualin thawnchhuah dawn chuan international standard, export quality thaa tah a ngai dawn a, chu chuan puantahte nasa zawka tan la thar tura a chawh phur a beisei tih a sawi a ni.
Minister hian puantah mi 30 tana ni 45 chhung Samarth Training neih tur hawng nghalin, veteran weaver-te hnenah chawimawina a hlan bakah puantah mi 21 hnenah National Handloom Development Programme hnuaia puantahna hmun sakna tur sumfai a hlan bawk.
National Handloom Day hi kumtin August 4-ah India ram pumah Swadeshi Movement hriatrengna atan Puantahtute Ni atan hman thin niin, ram mipui chu tualchher thil leh puan hmang uar tura inzirtirna atana hman a ni.
A lawmna hun pui ber chu Bharat Mandapam-ah India President hoin an hmang a. Commerce & Industries department chuan Mizoram aiawha he programme chhim hian Mizoram hmun hrang hrang ami puantahtu mi 5 a tir. He hun lawmna pakhat, sawrkar laipuiin a buatsaih ‘Exclusive Handloom Expo,’ Handloom Haat, Janpath New Delhi-a neihah Mizoram aiawhin Lapar leh Fungki an inphochhuak a ni.
Mizoram-a National Handloom Day vawi 11-na lawmna pui ber chu Millenium Centre Rooftop-ah hman a ni a. Commerce & Industries commissioner & secretary Lalzirmawia Chhangte chuan a hmanpui. Sailam cluster leh Tuirial cluster-ah hman ni bawkin, Sailam cluster-ah hian bialtu MLA Baryl Vanneihsangi’n a hmanpui a; Tuirial cluster-ah minister Dr Vanlalthlana’n a hmanpui.
National Handloom Day hmang
