Daily Newspaper

National Talent Search Exam-ah Mizo zirlai pathum tling

25

National Council of Educational Research and Training (NCERT) in tunhnaia National Talent Search Examination 2020 result a tihchhuahah Mizoram atangin zirlai pathum an tling.

NTSE-a inziak tlingte hi – Lalkhawngaihi, St Paul’s HSS; Samuel C Vanlalpeka, St Paul’s HSS leh Simon Lalremsiama, St Paul’s HSS te an ni.

NTSE hi kumtin class X zirlaite tan buatsaih thin a ni. State leh national level a awm a, state level chu India ram hmundang zawngah kumtin November Pathianni hmasa berah neih thin a ni a. Nagaland, Andaman & Nicobar Island, Meghalaya leh Mizoram-ah te chuan Pathianni hi ni pawimawh a nih avangin November Inrinni hmasa berah neih thin a ni. National level chu kumtin May Pathianni vawi hnihnaah neih a ni a, state level-a tlingten an exam leh thin a ni.

NTSE-ah hian paper pahnih a awm a. Paper I – Mental Ability Test (MAT) leh paper II – Scholastic Aptitude Test (SAT) te an ni. Multiple choice kalhmang ve ve a ni a, Scholastic Aptitude Test-ah hian science atangin item 40, social science atangin item 40 leh mathematics atangin item 20, a vaiin 100 chhan tur a awm a; NTSE-a tlingte hian thlatin scholarship an hmu thin a ni.

Scholarship hi tuna scheme hman laiah chuan science leh social science-a doctoral degree thlenga zir tumte leh professional course – medicine leh engineering zir zui tumte pek thin a ni a. Scholarship hi ram pumah mi 2000 hnenah pek thin niin, scheduled caste tan 15%, scheduled tribe tan 7.5%, OBC tan 27% leh vohbik zirlaite tan 4% hauhsak thin an ni. Scholarship hi higher secondary tan thlatin Rs 1250, graduate leh post graduate tan thlatin Rs 2000, Ph.D tan kum 4 chhung UGC norms angin pek thin a ni.

NTSE-ah hian hun engemawchen chu Mizoram atangin naupang an tling thei lo a, SCERT leh Samagra Shiksha ten a theih ang angin tan an la a, naupang pathum an inziak tling thei ta a ni.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy