Directorate of Science & Technology buatsaihin Zirtawpni khan Aizawlah ‘National Technology Day 2024’ hman a ni.
National Technology Day hi May 11 a ni a. Kumin hian remchan zawkna avangin Mizoramah chuan Zirtawpni khan hman niin, Planning (Science & Technology) secretary Lalmalsawma Pachuau chuan a hmanpui.
Kumin National Technology Day thupui chu ‘From School to Startups: Igniting Young Minds to Innovate’ tih a ni a. Scientific officer Edward Lalzuithanga’n Technology Day thupui hrilhfiahin presentation a pe a ni.
Scientific officer Dr Aldrin Malsawmtluanga chuan Mizoram atanga patent hmute lawmpuina thuziak leh sumfai a hlan a. MISTIC principal scientific officer Samuel Lalmalsawma’n innovator-te khawl siam chhuah, a hmangtu turte hnenah a sem bawk.
Day hmannaah hian Directorate of Science & Technology hnuaia MIRSAC, MISTIC leh Mizoram Science Centre bakah local innovator-te leh khawl siamchhuah dawngtute bakah St. Paul’s HSS zirlaite an tel.
National Technology Day hi kum 1998-a India-in ama kutchhuak technology, khawvel hriata a phochhuah Ni hriatrengna atana hman a ni a. Khatih hunlai khan khawvel hriatah India chuan nuclear siam thei ram a nih tih lantirin Rajasthan-a Pokran-ah hlawhtling takin nuclear a enchhin a, ‘Trishul’ missile hlawhtling takin a enchhin bakah thlawhtheihna ‘Hansa-3’ tia an vuah chu hemi ni hian hlawtling taka thlawhtir a ni bawk.
National Technology Day hmang
