Final a luhna kawnga world number three Carlos Alcaraz vawtlatu Andrey Rublev chu Madrid Open a khelh laiin damlohnain a tlakbuak a, damchiang vak lo chungin Pathianni khan final-ah set hmasa ber hloh zet chungin Felix Auger-Aliassime lakah 4-6 7-5 7-5 hnehna a sualchhuak a, a vawikhatna atan Madrid Open title a la.
Russian world number eight hi Pathianni final khelh hma lawk thleng khan a khua a sik a, set khatnaah a tuar ta reng a, mahse, beidawng loa khel zuiin world number 35 lakah hnehna a chang a, a career-a a Masters 1,000 tournament title pahnih a sualchhuak zui ta a ni.
Hnehna a chan zawhah Rublev chuan a hun tawn chu tawngkaa sawifiah ngaihna awm lo a nih thu sawiin, “Tun ni kaw liamta chhunga ka hun tawn hi min hriatpui ni ula chuan he title hi ka hlawhchhuak ang tih in ring hauh lo ang.
“Ka hlim takzet a, he hlawhtlinna ka chan theihna kawnga langsar ber chu min enkawltu doctor-te an ni. Ka inkhelh theih hram hramna turin theihtawp an chhuah a, he hun mak tak hi ka tawngbaw zui ta a ni.
“He title hi ka career-a ka title chhuan ber a ni tih ka sawi ngam a, A chhan pawh nitin mai hian ka thi thawthang a ni ber a, Zanah ka mu mang lo a, tun ni thum ni lo liamta khan zanah ka mu lo,” a ti.
Kum 26 mi hi Madrid a thlen hmaa a match hnuhnung paliah a tlawm zawn thawt a, mahse, Madrid Open-a a khelh dan enin French Open khelh chhoh turah hian inrintawkna a neih ngei a rinawm.
Final-a chak zo ta lo, kum 23 mi Auger-Aliassime kha semi-final lama a tumpui Jiri Lehecka khelh zawh theih loh leh quarter-final khelh hmaa khel bawr na avanga a tumpui tur world number two Jannik Sinner inhnuhdawh hlawkpuia hahdam zawka final lut a ni a, mahse, Canadian hian final-ah a ngam loh a tawng fuh ta a ni.
Natna hneha Madrid Open title latu Rublev
