Cardi B chuan a tum hnih nan a pasal Offset nena inthen dilna court-ah a theh lut leh ta a, mipa leh hmeichhe lama rapper hriathlawh pahnih te hi kum sarih an innei tawh a, fa pahnih an neih tawh bakah Cardi B hian an fa pathumna tur a pai mek bawk.
Cardi B hian Nilaini kalta khan inthen dilna hi a theh lut niin Page Six chuan an tarlang a, an fanu Kulture, kum 5, leh an fapa, Wave, kum 2, te enkawltu zawk nih a dil tel nghal bawk. Cardi thupuangtu chuan he inthen dilna hi eng emaw thil thleng tharlam awm vang emaw a nih loh thu sawiin, “A inmungna a rei tawh a, a pumpelh theih tawh loh a ni,” a ti.
Cardi B hian inthen dilna a theh luh thu leh a fa pathumna tur a pai thu a puan a inrual titih a, Instagram-ah a naupai pum puar deuh âl tawh thlalak post-in, “hmangaihna punna, nunna thar leh a ka chakna!” a ti a, chuta a pasal then tum chungchang tarlang tel nghalin, “Tawpna chuan bul tanna thar a thlen thin,”a ti bawk.
Cardi B leh Offset te hi 2017 khan inneiin, September 2020 khan Cardi B hian inthen dilna court-ah a lo theh lut tawh a, hetihlai hian a pasal rinawm loh thu a thang nasa viau a, mahse, Cardi chuan inrinawm loh san vang lam a nih loh thu sawiin, “Inhnial reng hi ka kham ve tawk tawh. Thil hmuhthiam theih reng reng loh mai hi ka ning ta,” a ti.
Mahse, thla khat vel chhungin an nupa inkar boruak chu an siamtha a, inthen dilna pawh November 2020-ah a hnuk kir leh ta a, kum li chhung an inkawp leh renrawn hnuah an inkar a khi tawh laklawh a ni ngei ang, a tum hnih nan court-ah inthen dilna a theh lut leh ta a ni.
Naupai mek Cardi B-i’n Offset nena in\hen dilna court-ah theh lut
