Naupang League match sing 1 khel tawh
Reliance Foundation leh Mizoram Football Association buatsaih, naupang football inelna chu match 10000 khelh tlin a ni ta a, hemi pual hian Inrinni khan Rajiv Gandhi Stadium Mualpui Aizawlah hun hman a ni a, Sports minister Lalnghinglova Hmar chuan a hmanpui. Naupang League hnuaiah hian district paliah naupang 3500 chuang an awm mek.
Minister chuan, India rama a vawikhatna turin Reliance Foundation chuan Mizoramah naupangte awmze neia football an zirna turin league mumal tak a kalpui a, he inelna – Naupang League tih hi football hmasawnna atan, naupang chherchhuahna atan leh discipline kenkawhna atan duhthusam a ni, tiin, a bul tantu zinga a tel ve thei chu lawmawm a tih thu a sawi a. Tuna a thlen chin chu an ngaihtuah phak piahlam a ni tawh tih a sawi.
Naupang League hi Aizawl, Lunglei, Champhai leh Kolasib-ah kalpui niin, naupang kum 6-14 inkar awmze neia football inelna a ni a; kum 2022-a khelh tan, a senso hi Reliance Foundation-in a tum a, Mizoram Football Association leh an hnuaia District Football Association-in an kalpui a, naupangte hian kum khatah competitive match vawi 30 chuang an khel a ni.
MFA president ni bawk Lalnghinglova Hmar chuan, tunhmain Mizo naupangin an naupanlaiin uniform jersey ha chunga referee hnuaia inkhelhna mumal an nei phak loa, match 10 pawh khel tling mang loin India inelna an hmachhawn fo tawh thin tih a sawi a. Naupang League-a telte erawh kum khatah competitive match 30 chuang an khel a, an nihlawh takzet a, an hmabak a eng hle tih a sawi a ni.
Naupang League bakah hian Reliance Foundation hnuaia kalpui mek Costal League-ah match 10000 khelh tlin lawmna a ni nghal a. MFA hruaitute, Reliance Foundation Young Champs aiawhte, players bakah naupang nu leh pate an tel a ni.
Naupang League match sing 1 khel tawh
