Naupang kum 4 pahnih chu swimming pool ah an chesual palh a, pakhat zawk thiin a dam khawchhuak zawk hian a thianpa hi amah chhan a tumna lama tuia lut ve chauh niin a sawi.
Thudawn danin, October 14 (Inrinni) chawhnu dar 2.00 vel khan Sairang Venglaia cheng naupang pahnih, Leo Lalchhuanmawia (4) s/o R Zoramchhani leh Jerome Vanlalhlua (4) s/o Lalvansiaka te hi an in bula picnic spot pakhata puitling chenna tura siam swimming pool ah thichhawnga hmuh an ni a, rang takin Sairang damdawi in panpui an ni a, Jerome hi chhan hman niin Leo hi chhan hman a ni lo.
An chetsual lai hi hmu an awm loa, nikhua a hriat hnua Jerome Vanlalhlua sawi danin, naupang tui chennaa an chen hnu ah chhuakin a bula puitling chenna tura siam swimming pool bula an kal laiin amah (Jerome) hi a tawlh a, pool-ah hian a tawlh lut a ni. A thianpa (Leo) hian chhan tumin pool-ah hian a lut ve a, an pahnih hian an tla dun ta a ni.
He thil thleng chungchangah hi chief minister Zoramthanga chuan a instagram account-ah tarlangin, Leo Lalchhuanmawia (kum 3 leh thla 11) miin, a thianpa tana a inpekna chu ropui a tih thu a sawi a. A thianpa chhan a tumna lama a nunna a chan chu pawi a ti hle tih sawiin, “Pathian angchhungah thlamuang takin chawl se, a kalsan tak a nu leh a chhungte pawh Pathian thlamuanna leh awmpuina ka dilsak a ni,” a ti.
Naupang tui tla chhan tum naupang vekin nunna a chan
