Naupanga social media khap tum Australia-ah naupang 80% chuangin hmang

Naupanga social media khap tum Australia-ah naupang 80% chuangin hmang
Australia-in naupang kum 16 hnuai lamte tan social media hman khap a tum mek laiin zirchianna neihah naupang kum riat leh 12 inkar 80% chuangin social media leh messaging service an hmang tih hmuh chhuah a ni.
Australia-in kum 16 hnuai lamten social media hman an khap tur hi kumin kum tawp atanga kalpui tan a nih rin a ni.
An rama internet regulator, eSafety chuan YouTube, TikTok leh Snapchat te chu naupangin an hman tam ber niin an sawi.
Regulator hian app-te hian an thil hmangtute hre vek turin an zawhna an chhang tha tawk lo tih an sawi.
Discord, Google (YouTube), Meta (Facebook leh Instagram), Reddit, Snap, TikTok leh Twitch chuan rang takin an zawhna an chhang hlawm lo tih an sawi.
Heng platform-te hi an indah dan chuan account neitu chu kum 13 chung lam an nih a ngai a, thenkhatah ngaihhnathiam erawh a awm.
Entir nan, YouTube chuan Family Link neiin account chu kum 13 hnuai lamin anmahni enkawltute enpuina hnuaiah an khawih thei a. Naupang bik tan YouTube Kids app an nei bawk.
YouTube bik hi naupang tana social media khap tur zingah a tel lo mai thei tih sawi a awm mek bawk.
“An thil hmuh chhuah hi thil kalpui zel tura min hruaitu atan a tangkai dawn hle a ni,” tiin eSafety commissioner Julie Inman Grant chuan a sawi.
Zirchiangtute chuan Australia puma naupang kum riat leh 15 inkar 1,500 chuang hnenah social media leh messaging platform an hman dan an zawt.
Kum riat leh 12 inkar zinga 84% chuan nikum kum tir atang khan vawi khat tal social media emaw, messaging service emaw an lo hmang tawh tih an sawi a. An zinga a zahve aia tam chuan an nu leh pa emaw, anmahni enkawltute account atanga an khawih niin an sawi.
Heng rual zinga hmun thuma thena hmun khat chuan anmahni pualin account an nei a, accout nei zinga 80% chuan an nu leh pa leh enkawltute atanga an hriat a ni.
Account nei zinga 13% chauh kum 13 hnuai lam an nih avanga social media company-in an account tihtawpsak an awm.
Snapchat, TikTok, Twitch leh YouTube chuan report siamtute hnenah hian tools leh technology an neih hmangin an service hmangtu kum 13 hnuai lam an hre thei tih an sawi.
“Heng hmanrua hi service hmangtuin a hman ngun dan azir (mi dang a biak, thil a dah chhuah leh a dangte) atangin a thawk a, kum tling lo an ni tih hriattirna an pe chhua chauh thin,” tiin report-ah hian tar lan a ni.