Naupang kum 1-19 inkarten rulhut an pai lohna tura rulhut hlo pek beihpui leh rulhutin a nghawng thalote inhrilhhriatna hun, National Deworming Day (NDD) 2024 chu Zirtawpni khan district hrang hrangah hman a ni.
Mamitah chuan Govt Mamit High School-ah hman a ni a. Senior chief medical officer Dr Lalhlunpuii chuan rulhut laka inven a pawimawh thu zirlaite hrilhin, damdawi ei bakah mahni tawka inven dan – kut silfai that, thlai leh thei eitur silfai that leh in leh a vel vawnfai a tul tih a sawi. Zirlai 90 ten rulhut damdawi- Albendazole mum an ei a, an district puma kumin atana pek an tum chu 35323 a ni.
Champhaiah pawh BC Lalthlamuana English Academy, Kahrawt Vengah bawrhsap VL Remliana hoa neih a ni a. NDD 2024 thawhhnihnaah hian Champhai district-a sawrkar school 332, private school 106 leh Anganwadi 288-ah rulhut hlo do beihpui hi kalpui a ni dawn. Hei bakah hian school kal tawh lo te tan pawh ruahmanna siam a ni. Tun tumah hian naupang 52609 hnenah pek tum a ni.
National Deworming Day hi kum tin vawi hnih, February thla leh August thlaah te hman thin a ni a. Health department bakah PHE, Women & Child Development, School Education leh Rural Development tanhonaa kalpui a ni.
Kolasibah chuan Tumpui Middle School-ah hman a ni a. NDD-ah hian Kolasib district chhu-ah target 31500 an awm a ni.
Naupangte rulhut hlo pe tan
