Alexei Navalny kha lung in tang inthleng tawna chhuah mai tur dinhmuna a din mek laiin tihhlum a ni tiin Navalny thawhpui Maria Pevchikh chuan a sawi.
Russian opposition leader Navalny chu Russian hitman tualthah avanga Germany a dam chhung lung in tang tur Vadim Krasikov nena inthleng tura tihfel vek tawh a ni a ti a.
He tang inthleng tawnnaah hian US khua leh tui pahnih Russia atang mek te pawh inthleng tawn turah an tel tiin Pevchikh chuan a sawi bawk.
Kremlin thupuangtu Dmitry Peskov thung chuan Financial Times hnenah chutiang inremna engmah hriat a neih loh thu a sawi thung.
Pevchikh thung chuan inremna a awm theih nana inbiakna chu 15 February khan a hmawr an bawk lek lek tawh a ti a. Mahse, 16 February khan Navalny chu Siberia a a tanna prison colony ah a thi ta a ni.
Prison official te chuan kum 47 a upa Navalny chu a walknaah tlu in a thi zui tiin an sawi thung.
Navalny YouTube channel a video a post ah Pevchikh, Navalny din Anti-Corruption Foundation (FBK) chairwoman ni bawk chuan lung in tang inthleng tawn nana inbiakna kum hnih kalpui a ni tawh a ti a.
February 2022 a Russia in Ukraine a run hnuah ‘Putin chuan a chawlhsan dawn lo tih a chiang tawh’ tia sawiin Navalny chu ‘a rang thei ang berin lung in atangin engtiang pawha chhuah zalen chu ngai a ni’ a ti a.
Pevchikh chuan Navalny chu humanitarian exchange a chhuah zalen mai tur niin inbiakna neihah US leh German official te pawh an inhnamhnawih vek a ti bawk a.
German sorkar thupuangtu chuan lung in tang inthleng tawn tumna chu hriat an neih thu an sawi a, mahse, engmah an sawi thui zui duh lo thung.
Pevchikh chuan lung in tang inthleng tawn chu December khan tihfel a ni tawh a ti a. Vadim Krasikov, Russian hitman kum 2019 a Germany a hnaih set sawta Chechen rebel commander Zelimkhan Khangoshvii a lu a kap tu chu inthleng tawn tura hmatheh a ni a ti a.
Hei bakah hian US khua leh tui pahnih Russia a tang mek te chu inthleng tawn turah an tel tiin Pevchikh chuan a sawi bawk. Russian lung in ah US khua leh tui thahnem tak an tang mek a ni.
February thlatir lam khan Russian President VLadimir Putin chuan US host Carlson Tucker hnenah American journalist Evan Gershkovich chhuah zalen a nih theih nan inbiakna an kalpui mek thu a sawi bawk.
Putin chuan kha interview ah khan Russia chuan ram hmangaihtu European capital a misual dahthatu chu chhuah zalen a duh a ni a ti bawk a, chu a thil sawi chu Krasikov ni ngeia ngaih a ni.
Russian thuneitute chuan Navalny ruang pawh a chuhngte hnenah an pe mai duh lo va, a thih atanga ni riatnaah a nu hnenah an pe chauh a ni.
Navalny nupui Yulia chuan a pasal chu Putin thupeka tihhlum tiin a sawi a. Kremlin chuan chu puhna chu a hnawl thung.
Thawhtan khan Navalny thupuangtu Kira Yarmish chuan social media kaltlangin tunkar tawp lamah mipui tena Navalny an mangtha theih nana ruahmanna siam an tum a ti a. Mahse, thuneitu ten an remti dawn nge a chiang lo thung.
Hetihlai hian rights group te chuan Navalny thih hnuah amah ui na lantir nana pangpar dahtu mi 400 chuang Russia thuneitu ten an man tawh an ti bawk.
Navalny kha tang inthlenga chhuak mai thei tur
