Daily Newspaper

Naya Rivera ruang an hmu ta

13

Glee star actress Naya Rivera, kum 33, chu ni nga chhung an zawn hnuah a ruang an hmu ta.

Rivera hian Nilaini kalta khan lawng hawhin, a fapa kum 4 mi, Josey, nen Lake Piru-ah tui cheng turin an kal a, lawng chu darkar thum atana hawh a ni a, mahse, a dah kir tak lawk loh avangin lawng neituten dil-ah an zawng a, mahse, lawngah chuan a fapa chauh an hmu ta a ni.

Hetiang a nih avang hian tuiah a tla a nih an ring nghal a, a ruang an zawng zui a, Thawhtanni kalta khan Ventura County Sheriff Department chuan a thi tawh ngeia ringin a thih thu hi an puang zui a, mi kut tuar ni loin, mahni tawka chesual ni ngeia a lan thu an sawi bawk.

Rivera hian kum 4 mi a nihin CBS comedy Royal Family-ah lemchan bul a tan a, 2009-ah Ryan Murphy-a ‘Glee’-ah changin, chu chu khawvelin a hmelhriat tanna a ni ta a ni. Glee-ah hian a tirah chuan cheerleader Santana angin guest role a chang a, mahse, a kum lehah chuan full-time cast-ah an la ta nghal a, Santana chu Glee fan-te an duhrawn tak ber pakhat a ni zui ta a ni.

Glee a hlawhtling bawka, a changtute pawh an lar hle a, chutah live concert te neiin, khawvel hmun hrang hrang an hrut a, a changtute pawhin rimawi khawvelah huang an zauh a, chung zingah chuan Rivera pawh telin 2011 khan solo artist angin Cloumbia Records-in an lalut a, a debut ‘Sorry’ chu September 2013-ah a tichhuak a, he hlaah hian rapper Big Sean-a’n a pui a, an pahnih hian an inngaihzawng zui a, inneih tuma an inhual hnuah an inthen leh ta a ni.

Glee a tawp hnuah Rivera hi drama series ‘Devious Maids’-ah chang lehin, tunhnaiah chuan Ne-Yo nen ‘Step Up’-ah an changdun leh a ni. Step Up-ah hian Rivera hi Colette Jones lemah a chang. Rivera hi ‘At the Devil’s Door’-ah pawh a chang a, he horror film hi movie-a a changtunu ber anga a inlanna hmasa ber a ni a, 2017 khan comedy Mad Families-ah a chang leh bawk.

Rivera hi Santa Clarita, California-a piang niin, a pa George pawh actor niin a ni, Yolanda chu model a ni a, a nau Mychal chu NFL-ah Olkland Raiders leh Jacksonville Jaguars tana khel a ni a, a laizawn Nickayla pawh model a ni.

Rivera hian 2016 khan a chanchin ziakna ‘Sorry Not Sorry: Dreams, Mistakes and Growing Up’ a lo tlangzarh tawh bawk a, he lehkhabu-ah hian a career insiam chhoh dan te leh Glee vanglai te pawh a tarlang a ni.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy