NBA All-Star game khel lo tur Joel Embiid

NBA All-Star game khel lo tur Joel Embiid
Season kal laia 76.5% chak nei mek Philadelphia 76ers player pawimawh Joel Embiid chu a khup hliam an zai avangin NBA All-Star game-ah a inlan thei dawn ta lo a, NBA Most Valuable Player award a kawl lai humhim beiseina pawh a tawp chawpchilh ve nghal.
76ers hian chak record nei tha viau mah se Embiid tel loa an chak record percentage chu 26.7 chauh niin, hei hian team tana reigning MVP ni mek pawimawhna a pholang chiang viau awm e.
A khup hliam an zai avang hian a lo berah pawh Philadelphia 76ers centre Joel Embiid hi chawlhkar li tal a chawlhhahdam a ngai dawn a, chuti chen chen chawl chung chuan MVP nih leh ngaihna a awm ta lo a ni.
Kum 29 mi Embiid hian MVP title humhim turin season kal laiah hian a tlem berah pawh match 65 tal a khelh tlin a ngai dawn a, a chawlh hun chhung tur nena chhutin MVP title humhim thei tura match khelh a mamawh zat hi a tlin zo dawn ta lo phawt a ni.
Tun season-ah hian a talbuai deuh sa tawh reng reng a, match 49 an khelh tawhah match 15 zet a khel lo tling.
Chawlhkar li a chawlh zui leh chuan match 11 dang a khel lo leh dawn tihna a ni ang a, a hnuah lo dam pawh ni se regular-season match 56 chu a khelh theih tur zat sangber a ni dawn a, MVP ni tura match khelh ngai zat chu match kuain a pha dawn lo tihna a ni.
Tun season kal laiah Joel-a hian match 34 khel tling tawhin, a hoa an inlanin 76ers hi vawi 26 an chak tawh a, vawiriat chiah an la tlawm thung.
A tel loa match 15 an khelh tawhah vawili chiah chakin, vawi 11 tehreng an tlawm a; tunah match 11 chu a lo berah an chhawr thei dawn lo niin a lang a, an thiampuipa tel lo hian vawi engzat tak chak zo ang maw?
He Cameroonian tana lungchhiatthlak lehzual turin February ni 18, Pathiannia All-Star game khelh turah a inlan thei dawn lo a, a zawna he game hlu bik vawiruk khel tling tawh hian a vawisarihna chu mahni in lum atangin emaw a thlir ve mai mai a ngai dawn ta a ni!
Karliamta Nilainia Golden State Warriors laka 119-107-a Philadelphia 76ers tlawm tum khan Embiid hian a khup veilam a tina a, MRI scan-in a hliam dinhmun a tihchian hnuah inzaina chemte a hmachhawn zui ta a ni.
2022-23 season-ah khan 76ers centre hian game tinah point 33.1 zel a thun anga tehchhuah niin, chu chuan MVP dinhmun-ah a vawrhchhuak ta hial kha a ni a; tun season kal mekah pawh a inhliam thleng khan NBA points-scorer tha ber ni leh mekin, game tina a point hmuh chawhrual chu 35.3 a tling a, minute tin point khat aia tam zel thawkchhuak ang a ni!
Inhliam loin he record ang zel hian season khar thei ta gnse NBA history-a game tina point 35 hmu pha ziah leh assist vawinga zel siamchhuak thei pahnihna nih theihna kawng a kaw ruih a, 1961-62 season-a chu record siamtu Wilt Cham-berlain hnung zui thei tura hun tha takin a hmuah mel laiin hliam lungchhiatthlak takin a tlakbuak zui ta hlauh a ni.