Daily Newspaper

NBA Champion Milwaukee Buck

21

Nilaini zing khan NBA final thawh rukna khelh a ni a. 3-2 a hmahruai tawh Milwaukee Bucks chuan 105-98 in an khingpui Phoenix Suns an hneh nawn leh a. Kum 50 zet hnuah a vawikhat nan NBA-ah an champion leh nawlh.

Final thawh ruknaah hian hmahruaitu Bucks in champion chian nghal tumin thapui an thawh a. Inkhel tantirh phat atangin nasa takin tan an khawh nghal. Hetihali hian Phoenix Suns in tlawm pumpelh a, champion beisei chhunzawm turin chak ngei an tum ve thung a, chak tumin tan an khawh nasa dun bawk a, inkhel hmuhnawm tak an lantir. Bucks player pawimawh Giannis Anteto-kounmpo a chetha hle a, point 50 zet thawkchhuakin a team a champion pui ta nghe nghe.

Final hmuhnawm tak hi khelmual chhungah mipui 17,000 zetin an tawiawm a. Fiserv Forum pawnah mipui 65,000 zet an pungkhawm bawk a, final boruak a lian hep hep hle. Inkhel ngaihven hlawh takah hian Bucks in bul an tan tha a, quarter hmasa berah point 29 an thawkchhuak a; point 13 in hma an hruai nghal pang a, champion an hnaih nghal deuh kuarh.

Bul tan chhe viau mahse Suns an buai zui lo va, tha chungchuang takin quarter hnihnaah an inlan. Quarter hnihnaah hian point 31 zet an thawkchhuak a, Bucks in point 13 lek an thawkchhuak ve thung. Quarter hnihnaah an khelh that em vang hian point nga zetin an khingpuite an tlan pel a, hmahruaitu ni chungin chawlhlawk an hmang. Quarter hmasa pahnihah an khelh dan a inthlak thawk thawk a, chak tur zawk rin thiam pawh a har hle a. Hei hi chawlhlawk hnu lam tinghahhlelhawmtu a ni.

Bucks in chawlhlawk an hmang tangkai a, third quarter-ah khel tha zawk an ni chhunzawm leh. Third quarter-ah hian point 5 in an chungnung zawk a, an khingpuite point thawhchhuah zat an nihrual chiah a. Chungnung zawk awm lovin quarter hnuhnung ber an hmachhawn theih phah. Quarter hnuhnung ber chu team hnihte inchinfelna tur tak tak a ni ta a, boruak a sang tawh tak zet. Fourth quarter, hun pawimawh leh boruak sanga takah hian Bucks an che tha zawk a. Point 28 zet an thawkchhuak a, Suns in point 21 chiah an thawkchhuak ve thung. Tichuan, Milwaukee Bucks chuan 105-98 in Bucks chuan hnehna pawimawh tak an chang a, kum 50 zet hnuah NBA champion an ni ve leh ta nawlh a ni. Kum 50 hnuah Bucks an champion nawlh lai hian anni aia champion ni tura nghak rei zawk Suns chuan erawh chuan a vawikhat nan NBA champion nih an tumna chu an puitling zo ta lo thung. Kum 1976 leh 1993 te khan Suns hian final lut bawk mahse tlawm zawkah an tang ve ve thung.

Inkhel pawimawh takah player ropui Giannis Antetokounmpo a che ropui leh pek hle. Kum 26 mi Giannis Antetokounmpo hian point 50 zet a thawkchhuak a, ball sawhlet vawi 10 a dawng tling bawk. NBA final-ah point 50 thawkchhuak thei mi pasarih chiah an la awm a, chung zinga tharlam ber chu Antetokounmpo hi a ni ta chiah bawk. Final-ah a chet that theih em vang hian Final MVP-ah thlan a ni nghe nghe. Tihian chawimawina hrang hrang MVP, NBA Finals MVP leh NBA defensive player of the year awards te a dawng kim ta chiah a. Heng chawi-mawna lo dawng tawh Michael Jordan leh Hakeem Olajuwon te dawn zat a tluk ta chiah. Champion an nih tum hian regular season MVP a ni phak lo teh tlat a, Final MVP a ni ve ta thung.

Milwaukee Bucks coach Mike Budenholzer chuan an player pawi-mawh Greek forward Giannis Anteto-kounmpo chu a fak hle a. “Mi bik a ni, a lak atang hian thil tam tak kan zir a, hruaitu tha bik a ni” tiin a fak. Kum 1971 a NBA legends Kareem Abdul-Jabbar leh Oscar Robertson ten NBA-ah Bucks an champion tum khan Mike Budenholzer hi kum li mi lek a la ni a. NBA 2021-a Bucks champion puitu player engemawzat nu leh pate hi khatih lai khan an la piang hmang lo hial nghe nghe. Hei hian an tan champion a hlut turzia a tichiang thei awm e.

NBA champion thar ni ta Bucks hian bul an tan chhe viau a, game hmasa pahnihah an tlawm zawn, NBA final game hmasa pahniha tlawm zawn hmasa zet chunga champion thei team li chiah an awm thin a, Bucks hi pangana chiah an ni ta bawk.

Rudy Gobert named 2020-21 Kia Defensive Player of the Year | NBA.com
Final MVP – Giannis Anteto-kounmpo

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy